თინა კანდელაკის თქმით, 5 წლის წინ ილია მეორემ პუტინთან დააბარა, რომ მისთვის ლოცულობს

სახელმწიფო ორდენებით დაჯილდოებული სხვა პროპაგანდისტების წინაშე სიტყვით გამოსვლისას, თინა კანდელაკმა თქვა, რომ რუსეთის მოქალაქეობა 25 წლის წინ, ვლადიმირ პუტინის პრეზიდენტობის პირველ ვადაში მიიღო. მან ხაზგასმით აღნიშნა, რომ რუსეთის მოქალაქეა „რწმენით და არა დაბადებით“.

„ხუთი წელი გავიდა მას შემდეგ, რაც საქართველოში არ ვყოფილვარ. ბოლოს იქ ხუთი წლის წინ ვიყავი და ისე მოხდა, რომ სრულიად საქართველოს კათოლიკოს ილიას შევხვდი. ილია ყოველთვის თბილ სიტყვებს მეუბნება და მითხრა: გთხოვ, ვლადიმირ ვლადიმიროვიჩს გადაეცი, რომ მისთვის ვლოცულობ. ხუთი წელი გავიდა და ეს შესაძლებლობა არ მქონია. დღეს ეს შესაძლებლობა მაქვს - ამ სიტყვებს გადმოგცემთ.

და მინდა აღვნიშნო, რომ დღეს ბევრი ადამიანი, მორწმუნე, ლოცულობს თქვენთვის, რადგან მორწმუნეებს მშვიდობა სურთ და თქვენ ხართ ის, ვისაც მთელ მსოფლიოში მშვიდობა მოაქვს“, – თქვა კანდელაკმა.

თინა კანდელაკი კრემლის პროპაგანდის გამავრცელებელი „გაზპრომ-მედია“ ჰოლდინგის გენერალური დირექტორის მოადგილეა. 24 დეკემბერს პუტინმა ასევე დააჯილდოვა სახელმწიფო ტელეკომპანია „როსსიას“ წამყვანი, პროპაგანდისტი ვლადიმირ სოლოვიოვი. ამ უკანასკნელმა „სამშობლოს წინაშე დამსახურებისთვის“ მე-3 ხარისხის ორდენი მიიღო.