ცხინვალის საოკუპაციო რეჟიმმა საქართველოს კიდევ ერთი მოქალაქე დააკავა

„სახელმწიფო საზღვრის დამრღვევი სამართალდამცველებმა გასულ საღამოს, სოფელ არცევის ტერიტორიაზე პატრულირებისას დააკავეს. მამაკაცის ვინაობა დადგენილია - ის 1992 წელს დაბადებული საქართველოს მოქალაქეა“, - ე.წ. შინაგან საქმეთა სამინისტროში განაცხადეს, რომ დაკავებული სამხრეთ ოსეთის დე ფაქტო რესპუბლიკის სახელმწიფო უსაფრთხოების კომიტეტს (კგბ) გადასცეს.

უკანონო დაკავების მორიგი ფაქტის შესახებ ინფორმაცია გაავრცელა საქართველოს სახელმწიფო უსაფრთხოების სამსახურმაც.

სტანდარტულ განცხადებაში ნათქვამია, რომ „ინფორმაცია უკანონო დაკავების მორიგი ფაქტის შესახებ დაუყოვნებლივ ეცნობა ჟენევის საერთაშორისო დისკუსიების თანათავმჯდომარეებსა და საერთაშორისო პარტნიორებს“.

სუს-ი ასევე აცხადებს, რომ ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად.

საქართველოს ცენტრალური ხელისუფლება ოკუპირებულ ტერიტორიებზე და საოკუპაციო ხაზის გასწვრივ ჩადენილ „დესტრუქციულ ქმედებებზე“ პასუხისმგებლობას „საოკუპაციო ძალას“ აკისრებს.

დღეის მდგომარეობით, ოკუპირებულ ცხინვალში უკანონო პატიმრობაში 11 პირი იმყოფება.