უკრაინის შეიარაღებული ძალების გენერალური შტაბი აცხადებს, რომ დაზვერვის ქვედანაყოფებმა გაანადგურეს დიდი რუსული სადესანტო ხომალდი „კეისარ კუნიკოვი“, რომელიც უკრაინის ტერიტორიულ წყლებში ალუპკას მახლობლად იმყოფებოდა.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
უკრაინის თავდაცვის სამინისტროს მთავარმა სადაზვერვო სამმართველომ გამოაქვეყნა ვიდეო, სადაც, სავარაუდოდ, გემზე დარტყმა ჩანს.
„კეისარ კუნიკოვის“ ჩაძირვის შესახებ უკრაინული მედია საკუთარ წყაროებზე დაყრდნობით წერდა. „უკრაინსკა პრავდას“ ინფორმაციით, სადესანტო გემზე თავდასხმა 14 თებერვალს, მთავარი სადაზვერვო სამმართველოს დრონებით მოხდა.
რუსეთის თავდაცვის სამინისტრო უკრაინის გენშტაბის განცხადებას არ გამოხმაურებია. მანამდე უწყებამ გაავრცელა ინფორმაცია, რომ 14 თებერვალს, შავი ზღვის აკვატორიის თავზე ექვსი უპილოტო საფრენი აპარატი ჩამოაგდეს.
„კეისარ კუნიკოვი“ შავ ზღვაზე რუსეთის სამხედრო ფლოტის ერთ-ერთი ყველაზე დიდი სადესანტო გემია, რომელიც 1986 წელს ააგეს. 112.5 მეტრი სიგრძისა და 15 მეტრი სიგანის ხომალდს შეუძლია 650 ტონა ტვირთი 4700 მილზე გადაიტანოს. მისი რეგულარული ეკიპაჟი 87 ადამიანია.
რუსეთმა „კეისარ კუნიკოვი“ გამოიყენა 2008 წლის აგვისტოში, საქართველოს წინააღმდეგ ომში, შავი ზღვის ფლოტის სამხედრო ოპერაციების დროსაც. კერძოდ, 10 აგვისტოს ის მოქმედებდა როგორც რუსული გემების ჯგუფის ფლაგმანი ქართული კატარღების ჯგუფთან შეტაკებისას.
2022 წლის თებერვალში, უკრაინაში რუსეთის სრულმასშტაბიანი ომის დაწყების დროს, „კეისარ კუნიკოვი“ ოკუპირებული ბერდიანსკის პორტში იმყოფებოდა. ის დაზიანდა იმავე წლის მარტში, როდესაც უკრაინულმა ძალებმა სადესანტო ხომალდი „სარატოვი“ ჩაძირეს.
