ვლადიკავკაზში ქორწილის მონაწილეები საქართველოს დროშების გამოყენებისთვის დააპატიმრეს

ქორწილი გასულ შაბათ-კვირას გაიმართა. სოციალურ ქსელებში გავრცელებულ ვიდეომასალაში ჩანს, როგორ ცეკვავენ ახალგაზრდები საქართველოს დროშებით ვლადიკავკაზის ცენტრში, ხოლო ავტომობილებით მსვლელობისას დროშებს კორტეჟის სხვა წევრებიც აფრიალებენ. კადრებში ე.წ. სამხრეთ ოსეთის სანომრე ნიშნების მქონე ავტომობილიც ფიგურირებს.

ვიდეომ ოკუპირებულ ცხინვალში დიდი რეზონანსი გამოიწვია. ადგილობრივ „ტელეგრამ-არხებზე“ ავტომობილის მფლობელის იდენტიფიცირებისა და მისი დასჯის მოწოდებები გაჩნდა.

„ალანია ნიუსმა“ (Alania News) გაავრცელა განცხადება, სადაც ნათქვამია: „მათ არა მხოლოდ საკუთარი თავი შეარცხვინეს, არამედ შეურაცხყოფა მიაყენეს ყველა ოსს... ოსეთში არ არის საქართველოს დროშის ადგილი, სახელმწიფოსი, რომელიც ერთი საუკუნის განმავლობაში ოთხჯერ ცდილობდა ოსი ხალხის განადგურებას“.

მოგვიანებით სოციალურ ქსელებში გამოქვეყნდა ვიდეო, სადაც ქორწილის რამდენიმე სტუმარი მომხდარის გამო საჯაროდ იხდის ბოდიშს და აცხადებს, რომ „გააცნობიერეს შეცდომა“.

„არავისთვის შეურაცხყოფის მიყენება არ გვინდოდა. აგვიხსნეს, რომ ეს ჩვენი მხრიდან არ იყო სწორი საქციელი. ყველას კარგად გვესმის, თუ რა მოხდა 1992 და 2008 წლებში“, - აცხადებს ვიდეოში ერთ-ერთი ახალგაზრდა.

ჩრდილოეთ ოსეთის შინაგან საქმეთა სამინისტრომ გამოძიება რუსეთის ფედერაციის სისხლის სამართლის კოდექსის 267.1 მუხლით დაიწყო. აღნიშნული მუხლი სატრანსპორტო საშუალებების მოძრაობისთვის საფრთხის შექმნას გულისხმობს და 2 წლამდე პატიმრობას ითვალისწინებს.

ამასთან, 8 პირს წვრილმანი ხულიგნობის ბრალდება წაუყენეს; მათგან 4-ს სასამართლომ უკვე შეუფარდა 10-დღიანი ადმინისტრაციული პატიმრობა.

მილიციამ კორტეჟში შემავალი ავტომობილები ნივთმტკიცების სახით ამოიღო და საჯარიმო სადგომზე გადაიყვანა.