4 առաջնահերթություն, որոնց շուրջ կաշխատի Ռոբին Դաննիգանը Վրաստանում դեսպան նշանակվելու դեպքում

«Առաջինը, իմ առաջնային պարտականությունը կլինի ապահովել ԱՄՆ դեսպանատանը աշխատող թիմի և Վրաստանում բոլոր ամերիկացիների անվտանգությունը։ Անցած 18 ամիսների ընթացքում աշխատելով Կիևում, շատ դժվար միջավայրում՝ մեր դեսպանատան թիմին անվտանգ պահելու համար, ես գիտեմ, որ այս պատասխանատվությունը սուրբ է:

Երկրորդ, եթե ինձ հաստատեն, ես կաշխատեմ Վրաստանի կառավարության և վրաց ժողովրդի հետ՝ օգնելու իրականացնել Եվրամիությանը, ՆԱՏՕ-ին և Արևմուտքին ինտեգրվելու նրանց ցանկությունը, նպաստել նրանց ժողովրդավարական ապագային:

Եվրատլանտյան ինտեգրումը ձեռնտու կլինի ոչ միայն Վրաստանի քաղաքացիներին, ես խորապես հավատում եմ, որ դա բխում է Միացյալ Նահանգների ազգային շահերից։ Մենք ցանկանում ենք Արևմուտքի հետ ամուր ինտեգրված ժողովրդավարական Վրաստան, որը կարող է պաշտպանել իր սահմանները և դիմակայել Ռուսաստանի վնասակար գործողություններին, ներառյալ ռուսական ապատեղեկատվության ճնշմանը», - ասել է Դաննիգանը:

Նրա խոսքով, Վրաստանը զգալի առաջընթաց է գրանցել վերջին 30 տարում, սակայն որոշ մտահոգիչ իրադարձություններ ցույց են տալիս, որ դեռ շատ անելիքներ կան։

«Եվրամիությունը Վրաստանին տվել է բարեփոխումների ճանապարհային քարտեզ, որը նա պետք է իրականացնի իր նպատակին հասնելու համար՝ Եվրամիության թեկնածուի կարգավիճակը։ Ինձ նշանակելու դեպքում, ես անհամբեր սպասում եմ Վրաստանին աջակցելու այդ բարեփոխումները շարունակելու հնարավորությանը:

Երրորդ՝ ես կուժեղացնեմ երկկողմ առևտուրը և ներդրումները, այդ թվում՝ Վրաստանում ամերիկյան ընկերությունների և ԱՄՆ-ում վրացական ներդրումների հնարավորությունների մեծացմամբ։ Ես ակտիվորեն կնպաստեմ ԱՄՆ արտահանմանը և կխրախուսեմ բարեփոխումները՝ արդար և թափանցիկ բիզնես միջավայր ստեղծելու համար: Ես նաև կաշխատեմ Վրաստանի կառավարության հետ՝ պաշտպանվելու պոտենցիալ հարկադիր տնտեսական պրակտիկաներից, այդ թվում՝ Ռուսաստանից և Չինաստանի Ժողովրդական Հանրապետությունից:

Ուկրաինայի դեմ Ռուսաստանի դաժան պատերազմը խախտում է ինքնիշխանության և տարածքային ամբողջականության վերաբերյալ ՄԱԿ-ի կանոնադրության ամենահիմնարար սկզբունքները։ Վրացիները շատ լավ գիտեն այս ռուսական ձեռնարկը, քանի որ 2008 թվականին այն տեսել են սեփական երկրում, և ամեն օր վերապրում են դա, քանի որ Ռուսաստանը բռնազավթել է Վրաստանի տարածքի մոտ 20%-ը։

Իմ վերջին առաջնահերթությունը լինելու է Վրաստանի ինքնիշխանության և տարածքային ամբողջականության պաշտպանությունը։ Ես պարտավորվելու եմ աշխատել Վրաստանի և մեր միջազգային գործընկերների հետ՝ ապահովելու, որ Ռուսաստանը կատարի 2008 թվականի հրադադարի համաձայնագրով և ՄԱԿ-ի կանոնադրությամբ ստանձնած պարտավորությունները:

Մեր 30-ամյա գործընկերությունը օգուտ է բերել ինչպես Վրաստանի ժողովրդին, այնպես էլ Միացյալ Նահանգներին: Վրաստանը 1994 թվականից ի վեր ՆԱՏՕ-ի հավատարիմ գործընկերն է խաղաղության պահպանման գործում և Աֆղանստանում ՆԱՏՕ-ի անդամ չհանդիսացող ամենամեծ ներդրողը` կանգնած է ամերիկյան զորքերի կողքին:

Մենք ունենք մարդկանց միջև հսկայական կապեր, հազարավոր փոխանակումներ տասնամյակների ընթացքում: Եթե ​​հաստատվի, ես անհամբեր սպասում եմ գործընկերության և համագործակցության այս հզոր ժառանգության վրա հիմնվելուն», - ասել է Ռոբին Դաննիգանը:

Նախագահ Ջո Բայդենը փետրվարի 13-ին Վրաստանում դեսպանի թեկնածու է առաջադրել Ռոբին Դաննիգանին։ Նա ներկայումս աշխատում է որպես պետքարտուղարի օգնականի տեղակալ Կենտրոնական և Արևելյան Եվրոպայի հարցերով Պետքարտուղարության Եվրոպայի և Եվրասիայի բյուրոյում: Նախկինում Դաննիգանը եղել է Ավստրիայում ԱՄՆ դեսպանատան գործերի ժամանակավոր հավատարմատարը և փոխդեսպանը: Տարբեր ժամանակներում նա զբաղեցրել է էներգետիկայի բյուրոյի փոխօգնականի պաշտոնը և աշխատել Վիետնամում, Չիլիում, Թուրքիայում, Կուբայում և Սալվադորում՝ ԱՄՆ դեսպանատներում։

Սենատի կողմից հաստատվելու դեպքում Ռոբին Դաննիգանը կփոխարինի Քելի Դեգնանին, ով Վրաստանում ԱՄՆ դեսպանի պաշտոնը ստանձնել է 2020 թվականի հունվարի 29-ից։