Ադրբեջանցի լրագրող Աֆղան Սադիգովը չոր հացադուլ է հայտարարել

«Աֆղանն ասել է, որ չոր հացադուլը կշարունակի մինչև վերջ։ Նրա վիճակը ծայրահեղ ծանր է։ Մինչ չոր հացադուլ սկսելը նա նիհարել էր 42 կիլոգրամ»,- ադրբեջանական Turan հրատարակությանը ասել է լրագրողի կինը՝ Սևինչ Սադիգովան։

Սադիգովայի խոսքով՝ Աֆղանի բանտարկությունը քաղաքական բնույթ ունի, և Վրաստանի կառավարությունը կատարում է Բաքվի հրամանները։

«Հունվարի 31-ին նրան դատարան են տարել վաղ առավոտյան, իսկ նիստը սկսվել է միայն ժամը 15-ին։ 130 օրից ավելի հացադուլավորին ինչպե՞ս կարելի է այսպես տանջել։ Սա ևս մեկ անգամ ցույց տվեց Վրաստանի կառավարության անմարդկայնությունը Աֆղանի նկատմամբ»,- նշել է Սևինչ Սադիգովան։

Ադրբեջանի կառավարության քննադատ, Azel.Tv առցանց հրատարակության գլխավոր խմբագիր Աֆղան Սադիգովը ձերբակալվել է 2024 թվականի օգոստոսի 3-ին Թբիլիսիում և այնուհետև դատապարտվել արտահանձնման կալանքի։ Վրաստանի ՆԳՆ-ի տվյալներով՝ Սադիգովը Ադրբեջանում հետախուզվում էր սպառնալիքների և շորթման համար։ Նրա դեմ գործը հարուցվել է 2024 թվականի մայիսին։ Այդ ժամանակ Աֆղան Սադիգովը կնոջ և երկու անչափահաս դուստրերի հետ արդեն մի քանի ամիս ապրում էր Թբիլիսիում։

Ձերբակալությունից հետո Աֆղան Սադիգովը միջազգային պաշտպանության համար դիմել է Վրաստանի իշխանություններին, սակայն ՆԳՆ միգրացիոն վարչությունը մերժել է՝ հայտարարելով, որ Ադրբեջանում նրա իրավունքների խախտում չի արձանագրվել։ Միգրացիոն վարչության որոշումը ուժի մեջ են թողել քաղաքային և վերաքննիչ դատարանները։

Մարդու իրավունքների եվրոպական դատարանը, հիմնվելով «Սոցիալական արդարության կենտրոն» ոչ կառավարական կազմակերպության բողոքի վրա, միջանկյալ որոշում է կայացրել, որով Վրաստանին արգելում է Աֆղան Սադիգովին արտահանձնել Ադրբեջանին։ Հունվարի 31-ին Թբիլիսիի քաղաքային դատարանը երեք ամսով երկարացրել է լրագրողի արտահանձնման կալանքը՝ մինչև մայիսի 3-ը։

Աֆղան Սադիգովը սեպտեմբերի 21-ից ի նշան բողոքի հացադուլ է հայտարարել և մնում է բանտի բուժհաստատությունում։