ԱՄՆ-ը կենտրոնացած է օգնելու Վրաստանին ազատ ընտրություններ ապահովելու համար. Ռոբին Դանիգան

«Ավելի ընդհանրական խոսեմ ընտրությունների մասին։ Թե՛ Վրաստանում, թե՛ Ամերիկայի Միացյալ Նահանգներում ընտրությունների տարի է։ Արդար ընտրությունները հզոր ժողովրդավարության հիմնաքարն են։ Այսպիսով, Միացյալ Նահանգները կենտրոնացած է օգնելու Վրաստանին ապահովելու ազատ, արդար, մրցակցային ընտրություններ: Մենք սերտորեն համագործակցում ենք քաղաքացիական հասարակության խմբերի, ընդդիմադիր կուսակցությունների և իշխող կուսակցության և հատկապես Կենտրոնական ընտրական հանձնաժողովի հետ՝ ապահովելու, որ Վրաստանի քաղաքացիները իմանան, որ իրենց ձայները հաշվվելու են արդարացիորեն, որ իրենց ձայները գաղտնի են, և որ գործընթացը ազատ և արդար է: Ուստի ես անհամբեր սպասում եմ, որ վրացիներն օգտվեն քվեարկելու իրենց ժողովրդավարական իրավունքից, իսկ ամերիկացիները նույնը անեն Միացյալ Նահանգներում»,- ասել է Ռոբին Դանիգանը:

Փետրվարի 20-ին Բրյուսելում Վրաստանի վարչապետ Իրակլի Կոբախիձեի հետ հանդիպումից հետո ԵՄ արտաքին հարաբերությունների և անվտանգության քաղաքականության հարցերով բարձր ներկայացուցիչ Ջոզեֆ Բորելը ընտրական բարեփոխումները նշեց մի քանի առաջնահերթությունների թվում։

«Այս տարի կարևոր փորձություն կլինի Վրաստանի ժողովրդավարության համար։ Ես սա կապում եմ ձեր ընտրական գործընթացի հետ։ Մենք ողջունում ենք մինչ այժմ իրականացված ընտրական բարեփոխումները և կոչ ենք անում ավարտել դրանք մինչև հաջորդ ընտրություններ, հաշվի առնել Վենետիկի հանձնաժողովի և ԺՀՄԻԳ-ի բոլոր համապատասխան առաջարկությունները՝ ազատ, արդար և մրցակցային խորհրդարանական ընտրություններ անցկացնելու համար»,- ասել է Բորելը։

Վրաստանում հաջորդ խորհրդարանական ընտրությունները պետք է անցկացվեն 2024 թվականի հոկտեմբերի 26-ին։ Պատգամավորները կընտրվեն միայն համամասնական ընտրակարգով։ Մանդատները կբաշխվեն այն քաղաքական կուսակցություններին, որոնք կհաղթահարեն 5 տոկոսանոց ընտրական շեմը։