«Անհնազանդություն եմ հայտարարում». Նիկոլոզ Ջավախիշվիլին բանտում վերսկսել է հացադուլը

«Ես՝ Նիկոլոզ Ջավախիշվիլին, լիակատար անհնազանդություն եմ հայտարարում ոչ լեգիտիմ իշխանությանը։ Ես դատապարտում եմ բռնությունը ուսանողների, լրագրողների, կանանց և վրաց ժողովրդի նկատմամբ։ Հացադուլ էի անում լրիվ անմարդկային պայմաններում (առողջությունս վատացավ, նորից ստիպված էի վերադառնալ): Վերջապես ես հասա լիարժեք պատրաստակամության և նորից եմ սկսում հացադուլը։

Իմ համերաշխությունն եմ հայտնում բոլոր հացադուլավորներին և ռեժիմի գերիներին։ Մեզանից քանիսի՞ն կբռնեն։ Չգիտեմ, թե ինչքան կարող եմ այստեղից դիմադրել, բայց կփորձեմ (գոնե հացադուլի միջոցով):

[...] Իմ պատասխանն է «հարձակմանը-հարձակումով»: Մենք ոչ մի քայլ ետ չենք գնա։ Եկեք օգնենք միմյանց և ի վերջո մենք կհաղթենք, այս ռեժիմը կփլուզվի, մենք էլ դուրս կգանք, և արդարությունը կհաղթի։

Ցանկանում եմ ձեզ լիակատար անհնազանդության և չհանձնվելու կոչ անել։ Մենք փառահեղ հաղթելու ենք»,- գրում է բանտարկյալը։

Նախկինում Նիկոլոզ Ջավախիշվիլին 5-օրյա հացադուլ էր հայտարարել՝ ի համերաշխություն ապօրինի բանտարկված Batumelebi/Netgazeti-ի ղեկավար Մզիա Ամաղլոբելիի։ Փաստաբանի խոսքով՝ առաջին հացադուլի ժամանակ նա նիհարել է 16 կիլոգրամով և երկու անգամ կորցրել գիտակցությունը։

Քրեական ոստիկանության վարչության աշխատակիցները Նիկոլոզ Ջավախիշվիլիին ձերբակալել են դեկտեմբերի 5-ին։ Նա մեղադրվում է խմբակային բռնության մեջ, նրան սպառնում է չորսից վեց տարվա ազատազրկում։

Նիկոլոզ Ջավախիշվիլիի գործին զուգահեռ քննվում են եվրոպամետ ցույցերի ժամանակ ձերբակալված Զվիադ Ցեցխլաձեի, Վեփխիա Կասրաձեի, Վասիլ Կաձելաշվիլիի, Գիորգի Գորգաձեի, Իրակլի Միմինոշվիլիի, Ինսաֆ Ալիևի և Թոռնիկե Գոշաձեի քրեական գործերը։