Ավստրիայի ԱԳ նախարարը Մակա Բոճորիշվիլիի հետ հանդիպման ժամանակ դատապարտել է «Երազանքի» գործողությունները

Նախարարի խոսքով՝ Վրաստանը Եվրամիությանն անդամակցելու ճանապարհով առաջ գնալու փոխարեն հետքայլեր է արել, ինչը «շատ ցավալի է, հատկապես, որ վրացիների ճնշող մեծամասնությունը եվրոպամետ կուրս է ուզում և փողոց է դուրս գալիս ԵՄ դրոշներով»։

«Մենք տեսնում ենք բարեփոխումների հետընթաց արդարադատության, օրենքի գերակայության և մարդու իրավունքների ոլորտներում: Մենք նույնիսկ տեսնում ենք հետընթաց, ինչպես օրինակ՝ քաղաքացիական հասարակության հետ կապված օրենսդրությունը կամ խորհրդարանական ընտրությունների ժամանակ ԵԱՀԿ/ԺՀՄԻԳ-ի կողմից հայտնաբերված խախտումները: Արդյունքում, ԵՄ անդամակցության գործընթացը ներկայումս կասեցված է:

Ես իմ վրացի գործընկերոջը պարզ ասացի, որ մենք խստորեն դատապարտում ենք խաղաղ ցուցարարների և լրատվամիջոցների ներկայացուցիչների նկատմամբ բռնությունը։ Վրաստանի իշխանությունները պետք է հարգեն հավաքների և արտահայտվելու ազատության իրավունքները և զերծ մնան ուժի կիրառումից։ Բռնության բոլոր ակտերը պետք է հետաքննվեն, և մեղավորները պատասխանատվության ենթարկվեն»,- ասել է ավստրիացի նախարարը հանդիպումից հետո կայացած մամուլի ասուլիսում։

Ինչպես նշել է նա, ի պատասխան բռնությունների՝ Եվրամիությունը կասեցրել է ավելի քան 120 միլիոն եվրոյի ուղղակի օգնությունը Վրաստանի կառավարությանը։ Նաև դադարեցվել է Խաղաղության եվրոպական հիմնադրամի աջակցությունը, որը նախատեսված էր 2024 թվականին, իսկ ընթացիկ՝ 2025 թվականին աջակցություն չի նախատեսվում։ 

Բացի այդ, Ավստրիայի արտգործնախարարն ընդգծել է, որ Եվրամիությունը և Ավստրիան կշարունակեն աջակցել Վրաստանի քաղաքացիական հասարակությանը։

«Մենք ցավում ենք, որ Վրաստանի կառավարությունը որոշել է կասեցնել Եվրամիությանն անդամակցելու գործընթացը մինչև 2028 թվականը։ Իրադարձությունների հետագա զարգացումն ամբողջությամբ կախված է Վրաստանի կառավարության քայլերից։

Վստահ եմ, որ այն հարցը, թե ինչպես պետք է գնանք դեպի Եվրամիություն, ամբողջովին կախված է ձեր որոշումից։ Իհարկե, սա ինքնիշխան որոշում է, բայց պարզ է նաև, որ մենք ողջունում ենք ձեր ավելի ակտիվ ջանքերը եվրոպական այս ճանապարհին։

Ես դեմ եմ դուռն ամբողջությամբ փակելուն։ Կարծում եմ՝ ես դա պարզ դարձրի այսօրվա հանդիպմանը։ Կարևոր է բաց պահել շփման ուղիները։ Վիեննան երկար ժամանակ եղել է երկխոսության և դիվանագիտության կենտրոն: Թե՛ մեր այսօրվա հանդիպումը, թե՛ վրացի մեր գործընկերների այցը Վիեննա՝ ԵԱՀԿ, ընդգծում են այս դերը։

Մենք պատրաստ ենք աջակցել վրաց ժողովրդի եվրոպական նկրտումներին և Վրաստանի անդամակցության ուղուն, եթե Վրաստանի կառավարությունը փոխի իր ներկայիս գործելաոճը։

Նաև եվրոպամետ կուրսին վերադառնալը կհամապատասխանի Վրաստանի բնակչության մեծամասնության կամքին, որի ավելի քան 80%-ը կողմ է ԵՄ անդամակցությանը», - ասել է Բեատե Մայնլ-Ռեյզինգերը:

Ավստրիայի արտգործնախարարը նշել է, որ անհրաժեշտ է երկխոսություն քաղաքական ընդդիմության և քաղաքացիական հասարակության հետ։ Նա Վրաստանում քաղաքական իշխանություն ունեցողներին կոչ է արել հաղթահարել պառակտումն ու բևեռացումը։

Ավստրիական կողմի տեղեկություններով՝ հանդիպման մյուս թեմաներն են եղել Ուկրաինայի դեմ Ռուսաստանի ագրեսիվ պատերազմը և այլ երկրներում ապակայունացման փորձերը։ Բեատե Մայնլ-Ռեյզինգերը նշել է, որ անհրաժեշտ է միավորել ուժերը՝ դիմակայելու Ռուսաստանի կեղծ նարատիվներին։

Մակա Բոճորիշվիլին ասուլիսում չի արձագանքել Բեատե Մայնլ-Ռեյզինգերի քննադատական ​​հայտարարություններին և շնորհակալություն է հայտնել նրան տարբեր հարցերի շուրջ իր կարծիքներով կիսվելու համար։ «Վրացական երազանքի» արտաքին գործերի նախարարության մամուլի հաղորդագրության մեջ նույնպես չի նշվում ԵՄ անդամակցության գործընթացի կասեցման և ցուցարարների և լրատվամիջոցների ներկայացուցիչների նկատմամբ բռնությունների հետ կապված ավստրիացի դիվանագետի հայտարարությունների մասին։