Այս օրենքն ընդունելու կառավարության պնդումը ապակայունացման ռուսական ռազմավարություն է․ Նախագահ

«Թբիլիսիում ռուսական օրենքի դեմ զանգվածային բողոքի ցույցի երկրորդ օրն է։ Կառավարության պնդումը ընդունել այս օրենքը հանրության կամքին հակառակ և չնայած իր գործընկերների բողոքներին, ուղղակի սադրանք է՝ ապակայունացման ռուսական ռազմավարություն»,- գրել է նախագահը X սոցիալական ցանցում։

Թբիլիսիում Խորհրդարանի շենքի մոտ բողոքի ակցիա է տեղի ունեցել, որի մասնակիցները իշխող կուսակցությունից պահանջել են հետ կանչել անկախ ԶԼՄ-ներին և քաղաքացիական հասարակությանը սահմանափակող օրենքի նախագիծը։

Ներքին գործերի նախարարությունը խորհրդարանի մոտ մոբիլիզացրել է մեծ թվով ոստիկաններ, հատուկ ջոկատայիններ և ջրցան մեքենա։

Օրենսդիր մարմնի հետևի մուտքի մոտ խաղաղ ցուցարարների դեմ հավանաբար օգտագործվել է պղպեղի սփրեյ։

Հանրահավաքի մի քանի մասնակիցներ ձերբակալվել են։ Նրանց թվում է «Լելո» կուսակցության առաջնորդներից Իրակլի Կուպրաձեն։

«Վրացական երազանքը» ապրիլի 15-ին իրավական հարցերի հանձնաժողովում հավանություն է տվել այսպես կոչված «օտարերկրյա գործակալների» օրենքի նախագծին, իսկ երեկ այն քննարկման է դրվել լիագումար նիստում, թեև նիստն ավարտվել է առանց քվեարկության։ Իշխող կուսակցության անդամները հատուկ ջոկատայինների ու ոստիկանների օգնությամբ են լքել օրենսդիր մարմինը։ Օրինագծի քննարկումը կշարունակվի ապրիլի 17-ին՝ ժամը 12:00-ից։