Բաքվից Գրոզնի թռչող մարդատար ինքնաթիռը կործանվել է Ղազախստանի տարածքում

Ականատեսները Orda.kz-ին պատմել են, որ կործանված ինքնաթիռում թթվածնի բալոն է պայթել։ Նրանց խոսքով՝ մինչ այդ թռչուններ են հայտնվել շարժիչի մեջ։

Embraer 190 ինքնաթիռում եղել է 62 ուղևոր և անձնակազմի 5 անդամ։ Ինչպես հայտնում են ղազախական լրատվամիջոցները, հիվանդանոց են տեղափոխվել նաև 11 և 16 տարեկան վիրավոր դեռահասներ։

Ինքնաթիռը պետք է վայրէջք կատարեր Գրոզնիի օդանավակայանում, սակայն մառախուղի պատճառով այն ուղղություն է բռնել դեպի Մախաչկալա։

«Ադրբեջանի ավիաուղիների» հաղորդագրության համաձայն, ըստ նախնական տեղեկությունների՝ ավիավթարի պատճառը եղել է ինքնաթիռի և թռչունների երամի բախումը։

Ադրբեջանի նախագահ Իլհամ Ալիևի հանձնարարությամբ կառավարության ներկայացուցիչների պատվիրակությունը մեկնել է Ակտաու՝ ուսումնասիրելու միջադեպի հանգամանքները։

«Ադրբեջանի ավիաուղիները» Ադրբեջանի խոշորագույն ավիաընկերությունն է, որը հիմնադրվել է 1992 թվականին։