Բաթումիում գտնվող «Երազանքի քաղաքի» տարածքում երկու անչափահաս երեխաներ ընկել են ջրով լցված փոսը և մահացել։ Դեպքը տեղի է ունեցել այսօր՝ փետրվարի 15-ին։
Լրահոս
Ընթերցողի ընտրանի
- 1 Ես կանեմ ամեն ինչ, որպեսզի Իվանիշվիլին կորցնի ամենաթանկը՝ փողն ու իշխանությունը. Գախարիա
- 2 Թբիլիսիի քաղաքապետարանը խուսափում է 16-ամյա տղայի մահվան դեպքի համար պատասխանատվությունից
- 3 Արդյո՞ք Վրաստանում թայլանդացի կանանցից բռնի կերպով ձվաբջիջներ են ձեռք բերում
- 4 Պատժամիջոցների ենթարկվելուց հետո Իվանիշվիլին օֆշորներից արդեն 12 ընկերություն է տեղափոխել Վրաստան․ TI
- 5 Ոստիկանները մտել են քաղաքացիական ակտիվիստների տներ, ձերբակալվել է Իսակո Դևիձեն
- 6 Լարին դոլարի նկատմամբ արժեզրկվել է 2 թեթրիով, եվրոյի նկատմամբ՝ 4 թեթրիով
«Բաթումելեբի» լրատվամիջոցի տվյալներով՝ երեխաները փոսն են ընկել այն տարածքում, որտեղ շինարարական աշխատանքներ են ընթանում։ Մահացածները 4 և 5 տարեկան են։
«Դժբախտ պատահարը տեղի է ունեցել Բաթումի քաղաքում, Փ․ Խալվաշի պողոտայի թիվ 188 հասցեի մոտ։ Երկու անչափահաս ընկել է ջրով լցված փոսը, ցավոք, նրանց փրկել չի հաջողվել»,- ասվում է Բաթումիի քաղաքապետարանի տարածած հայտարարության մեջ։
Այս պահին դեպքի վայրում քաղաքացիներ են հավաքվել։ Նրանք պահանջում են դադարեցնել շինարարությունը և կատարվածի համար մեղադրում են կառավարությանը։
Մեկ շաբաթ առաջ՝ փետրվարի 8-ին, «Վրացական երազանքի» վարչապետ Իրակլի Կոբախիձեն և Աջարիայի կառավարության նախագահ Թոռնիկե Ռիժվաձեն հայտարարեցին «Երազանքի քաղաքի» շինարարության երկրորդ փուլի մեկնարկի մասին։ Նրանք մասնակցել են հիմնարկեքի արարողությանը, որի համար բյուջեից ծախսվել է 209 165 լարի։
Փետրվարի 15-ին ողբերգության վայր ժամանած Աջարիայի ֆինանսների և էկոնոմիկայի նախարար Ջաբա Փուտկարաձեն վստահեցրել է, որ այն տարածքը, որտեղ երեխաները մահացել են, շինհրապարակ չէ։
Ջաբա Փուտկարաձեն լրատվամիջոցների ներկայացուցիչներին մեղադրել է շահարկումների մեջ, երբ նրանք հարցեր են տվել շինարարության անվտանգության ստանդարտների խախտման վերաբերյալ։
«Շատ կարևոր է, որ սա երկրորդ փուլի շինարարական տարածք չէ։ Սա շատ հեռու է այն վայրից, որտեղ տեղի կունենան երկրորդ փուլի շինարարական աշխատանքները։ Շատ կարևոր է, որ այս հարցի հետ կապված տարբեր տեսակի շահարկումներն ավարտվեն, քանի որ, ինչպես գիտեք, բավականին այնպիսի ֆոն է, որ բնակչությունը և, սկզբունքորեն, բոլորս շատ վատ ենք զգում», - ասել է Փուտկարաձեն։
Նրա խոսքով՝ «Երազանքի քաղաքում» շինարարական աշխատանքների առաջին փուլի ավարտից և ընտանիքներին բնակարանների հատկացումից հետո ապամոնտաժվել փայտե տներն ու շենքերը։
Այն բանից հետո, երբ քաղաքացին հարցրել է, թե ինչու են տրակտորներն աշխատում, և ինչո՞ւ տարածքը չի պարսպապատվել, երբ այնտեղ փոս է եղել, Փուտկարաձեն մի քանի անգամ կրկնել է, որ «նախապատրաստական աշխատանքներ են տարվում»։
«Նախաշինարարական նախապատրաստական աշխատանքները շարունակվում են։ Մինչ շինարարական աշխատանքների իրականացումը, բնականաբար, տարածքում կլինի համապատասխան պարիսպ։ Մրցույթն ավարտված է, և մենք սկսում ենք շինարարական աշխատանքները։ Մինչ շինարարական աշխատանքները սկսելը նախապատրաստական աշխատանքներ են ընթանում։ Ողբերգություն է տեղի ունեցել, և բոլորի համար կարևոր է խաղաղ մնալ»,- ասել է նա։
«Երազանքի քաղաքի» տարածքը պատկանում է Աջարիայի ֆինանսների և էկոնոմիկայի նախարարությանը։
ՆԳՆ-ից հայտնում են, որ դեպքի առթիվ հետաքննություն է տարվում Քրեական օրենսգրքի 116-րդ հոդվածով, որը վերաբերում է անզգուշությամբ սպանությանը։
Բաթումիի ծայրամասում՝ նախկին ռազմաբազայի տարածքում, «Երազանքի քաղաքը» ստեղծվեց 2012 թվականին, երբ այնտեղ հաստատվեցին Աջարիայի լեռնային շրջանում բնակարանային խնդիրներ ունեցող ընտանիքները։ Այդ ժամանակվանից նրանք ապրում են ծայրահեղ ծանր պայմաններում՝ փայտե տներում, պահանջում են կառավարությունից ստեղծել արժանապատիվ կենցաղային պայմաններ։
«Երազանքի քաղաքում» բնակարանների կառուցման առաջին փուլը սկսվել է 2020 թվականին և ավարտվել անցյալ տարի։ 582 ընտանիք տեղավորվել է երեք 12 հարկանի շենքերում։
Երկրորդ փուլում նախատեսվում է կառուցել ինը բազմահարկ շենք։ Ծրագիրը, որը նախատեսվում է ավարտել 2028 թվականին, նախատեսված է 1077 բնակարանի համար։ Շինարարական աշխատանքները կիրականացնի «Անագի» ընկերությունը։
