Բավական ժամանակ է անցել, որպեսզի հույզերը հանդարտվեն, կյանքը վերադառնա բնականոն հունի. Պապուաշվիլի

Պապուաշվիլին շարունակվող բողոքի ակցիաներն անվանել է երկիրը տապալելու հուսահատ փորձ և ասել, որ «դա չի աշխատել և չի աշխատի»։

«Ներկայիս բողոքի ակցիան բովանդակություն չունի։ Դրա համար մենք ելույթներ չենք լսում, դրա համար էլ խուսափում էին բանավեճերից, դրա համար էլ նախընտրում էին աղմուկը։ Նրանք առարկում են այն, ինչ գոյություն չունի բնության մեջ։ Ոչ ոք չի կարողանում ասել ու նշել կոնկրետ ու շոշափելի գործոն, որն առաջարկում է Եվրամիությունը, իսկ իշխանությունը մերժում է։ Բոլորս գիտենք, որ ԵՄ-ին անդամակցելու հնարավորությունը կառաջանա միայն 2030 թվականին։ Մեր ծրագիրը ուղղված է այս ժամկետին։

Բանակցությունների մեկնարկը եվրոպական կառույցների ձեռքում է։ Վրաստանն ամենաարժանավորն է և ամենապատրաստը՝ սկսելու գործընթացը։ Մեզ համար կբացեն, մենք կընդունենք, կստորագրենք ու կկատարենք»,- ասել է Շալվա Պապուաշվիլին։

Նա կոչ է արել բողոքի ակցիայի մասնակիցներին, այդ թվում՝ ընդդիմադիր կուսակցություններին, վերադառնալ «պետական ​​ու սահմանադրական դաշտ»։

«Քաղաքացիների այս խմբերը գործադուլի կոչեր անելու կամ ստորագրահավաքներ անելու փոխարեն, որոնք ոչ մի արդյունք չեն տա, բացառությամբ համակարգի ինքնալյուստրացիայի, պետք է բացահայտեն, թե ում են սատարել ընտրություններում և պահանջեն, որ իրենց ընտրած կուսակցությունները ստանձնեն երկրի ապագայի պատասխանատվությունը»,- ասել է Պապուաշվիլին։

Թբիլիսիում՝ Ռուսթավելիի պողոտայում, բողոքի ցույցերը ընթանում են նոյեմբերի 28-ից։ Բողոքի պատճառ է դարձել Վրաստանի ոչ լեգիտիմ կառավարության որոշումը, ըստ որի՝ Եվրամիության հետ բանակցություններ սկսելու հարցը օրակարգում չի լինելու մինչև 2028 թվականի վերջը, և միևնույն ժամանակ Վրաստանը հրաժարվելու է Եվրամիության բյուջետային ցանկացած դրամաշնորհից։

Ներքին գործերի նախարարությունը բազմիցս ցրել է ցույցերը՝ օգտագործելով ջրցան մեքենաներ, արցունքաբեր գազ և այլ հատուկ միջոցներ։ Հանրահավաքի ավելի քան 300 մասնակից բերման է ենթարկվել քրեական և վարչական կարգով։ Նրանց մեծ մասին ոստիկանական ուժերը դաժան ծեծի են ենթարկել։

Բացի հանրահավաքի մասնակիցների ձերբակալությունից, ՆԳՆ-ն մի շարք խուզարկություններ է իրականացրել ընդդիմադիր կուսակցությունների գրասենյակներում և ակտիվիստների բնակարաններում՝ տարբեր հիմքերով ձերբակալելով ընդդիմության առաջնորդներ Ալեքսանդր Էլիսաշվիլիին և Նիկա Գվարամիային։