Ծալենջիխայի քաղաքապետարանը Մագանա գետի մոտակայքում ապրող բնակիչներին զգուշացրել է հեռու մնալ տներից

Ջվարիի բնակիչները նկատել են, որ գետում ջրի հոսքը նվազել է։ Տեղացիները ենթադրել են, որ հովտում ջուրը կարող է կուտակված լինել։

Կառավարության ներկայացուցիչները օդային տեսախցիկով զննել են հովտի մի մասը, սակայն, ըստ Ծալենջիխայի քաղաքապետ Գիորգի Խարչիլավայի, գիշերվա պատճառով Խոկոյի կիրճի վերին հատվածը հնարավոր չի եղել զննել։ Նրա խոսքով, այսօրվանից մասնագետներ կներգրավվեն տարածքի ուսումնասիրության գործում։

Շրջակա միջավայրի ազգային գործակալության տեղեկատվության համաձայն՝ սեպտեմբերի 9-ից մինչև սեպտեմբերի 10-ի առավոտ Արևմտյան Վրաստանի մեծ մասում և Արևելյան Վրաստանի որոշ շրջաններում կրկին սպասվում են առատ տեղումներ, կայծակ և կարկուտ։ Արևմուտքի ուղղությամբ կփչի ուժեղ քամի, ծովում հնարավոր է 3-4 բալանոց փոթորիկ։

Սեպտեմբերի 9-ից սպասվում է օդի ջերմաստիճանի զգալի անկում, իսկ բարձր լեռնային շրջաններում հնարավոր են ձյան տեսքով տեղումներ։

Վրաստանում սպասվող առատ տեղումները կարող են առաջացնել գետերում ջրի մակարդակի զգալի աճ, փոքր գետերի վարարումներ, լեռնային շրջաններում սողանքային-հեղեղային գործընթացների սկիզբ և ակտիվացում։

Սեպտեմբերի 8-ին հորդառատ անձրևի հետևանքով Գուրիայում սողանքներ են տեղի ունեցել, ինչի հետևանքով զոհվել է մեկ տարեց կին և 2 երեխա։ Ավերվել են մի քանի տներ, վնասվել են ենթակառուցվածքներ։ Մինչ այժմ Գուրիայի մի քանի գյուղեր կտրված են արտաքին աշխարհից։