Դատավորը կասեցրել է Թրամփի հրամանը, որը սահմանափակում է ծննդյան իրավունքով քաղաքացիությունը

Դատավոր Ջոն Քուենուրը քննարկել է չորս նահանգների՝ Վաշինգտոնի, Արիզոնայի, Իլինոյսի և Օրեգոնի դատախազների հայցը և արձակել ժամանակավոր խափանման միջոց, որն երկու շաբաթով արգելում է Թրամփի վարչակազմին կատարել հրամանը: Այս ընթացքում դատավորը պետք է մտածի, թե արդյո՞ք պետք է երկարաժամկետ արգելք արձակել՝ մինչև գործի վերաբերյալ վերջնական որոշում կայացնելը:

Թրամփը վիճահարույց գործադիր հրամանը ստորագրել է երկուշաբթի՝ իր պաշտոնավարման առաջին օրը։

Ինչպես հաղորդում է Reuters-ը, նշված նահանգները պնդում են, որ հրամանը խախտում է ԱՄՆ Սահմանադրության 14-րդ ուղղումով ամրագրված իրավունքը, ըստ որի՝ ԱՄՆ-ում ծնված յուրաքանչյուր ոք համարվում է քաղաքացի։

Դատավորը որոշումն անվանել է «բացահայտ հակասահմանադրական»:

«Ես ավելի քան չորս տասնամյակ աշխատում եմ դատարանում և չեմ կարող հիշել մեկ այլ դեպք, որտեղ հարցը դրված լինի նույնքան հստակ, որքան այս դեպքում։ Սա կոպիտ հակասահմանադրական որոշում է», - ասել է դատավոր Քուենուրը:

Թրամփի գործադիր հրամանի համաձայն՝ ԱՄՆ-ում փետրվարի 19-ից հետո ծնված ցանկացած երեխա, որի մայրը և հայրը չեն հանդիսանում ԱՄՆ քաղաքացիներ կամ օրինական մշտական ​​բնակիչներ, ենթակա է արտաքսման։

Արդարադատության դեպարտամենտը մտադիր է պաշտպանել հրամանը, սակայն Վաշինգտոնի գլխավոր դատախազ Նիք Բրաունը դեպարտամենտի հաջողության հիմքեր չի տեսնում, նույնիսկ եթե գործը հասնի Գերագույն դատարան, որի պահպանողական մեծամասնությունը (6-3) ներառում է Թրամփի կողմից նշանակված երեք դատավորներ:

Չորս նահանգների դատախազները պնդում են, որ եթե նախագահի նոր գործադիր հրամանն ուժի մեջ մտնի, ապա ամեն տարի ավելի քան 150 000 նորածիններ քաղաքացիության մերժում կստանան։