მოსამართლემ შეაჩერა დაბადებით მოქალაქეობის უფლების შეზღუდვაზე ტრამპის განკარგულება

მოსამართლე ჯონ კუენურმა ოთხი შტატის - ვაშინგტონის, არიზონას, ილინოისისა და ორეგონის პროკურორების სარჩელი განიხილა და გამოსცა დროებითი შემაკავებელი ორდერი, რომელიც ტრამპის ადმინისტრაციას ორი კვირის განმავლობაში განკარგულების აღსრულებას უკრძალავს. ამ პერიოდში მოსამართლემ უნდა განიხილოს, გამოსცეს თუ არა გრძელვადიანი აკრძალვა საქმეზე საბოლოო გადაწყვეტილების მიღებამდე.

ტრამპმა სადავო განკარგულებას ხელი ორშაბათს, პრეზიდენტის თანამდებობაზე დაბრუნების პირველივე დღეს მოაწერა.

როგორც სააგენტო Reuters-ი წერს, აღნიშნული შტატები ამტკიცებენ, რომ განკარგულება არღვევს აშშ-ის კონსტიტუციის მე-14 შესწორებაში განმტკიცებულ უფლებას, რომლის მიხედვითაც, შეერთებულ შტატებში დაბადებული ნებისმიერი ადამიანი არის მოქალაქე.

მოსამართლემ განკარგულებას „უხეშად არაკონსტიტუციური“ უწოდა.

„ოთხ ათეულ წელზე მეტია სასამართლოში ვმუშაობ და არ მახსოვს სხვა შემთხვევა, როცა საკითხი დასმული ყოფილიყო ისე ნათლად, როგორც ამ შემთხვევაში. ეს არის უხეშად არაკონსტიტუციური განკარგულება“, - თქვა მოსამართლე კოენურმა.

ტრამპის განკარგულების მიხედვით, 19 თებერვლის შემდეგ შეერთებულ შტატებში დაბადებული ნებისმიერი ბავშვი, რომლის დედა და მამა არ არიან ამერიკის მოქალაქეები ან კანონიერი მუდმივი რეზიდენტები, დეპორტაციას დაექვემდებარება.

იუსტიციის დეპარტამენტი განკარგულების დაცვას აპირებს, თუმცა, ვაშინგტონის გენარალური პროკურორი ნიკ ბრაუნი ვერ ხედავს საფუძველს დეპარტამენტმა წარმატებას მიაღწიოს, მაშინაც კი, თუ საქმე უზენაეს სასამართლოში წავა, რომლის შემადგენლობის კონსერვატიული უმრავლესობა (6 – 3-ზე) ტრამპის მიერ დანიშნულ სამ მოსამართლეს მოიცავს.

ოთხი შტატის პროკურორები აცხადებდნენ, რომ პრეზიდენტის ახალი განკარგულების ძალაში შესვლის შემთხვევაში, მოქალაქეობაზე უარს ყოველწლიურად 150 000-ზე მეტი ახალშობილი მიიღებს.