ԵՄ-ում պետք է քննարկենք Վրաստանի անդամակցության գործընթացի պաշտոնական կասեցման հարցը․ Բերբոք

«Վրաստանի բնակչության մեծամասնությունը ցանկանում է, որ երկիրը պահպանի եվրոպական կուրսը։ Եվրոպան նրանց սրտերում է, իսկ եվրոպամետ բողոքները նրանց ձայնն են: Սակայն իշխող «Վրացական երազանք» կուսակցությունը պատասխանում է ահաբեկումներով, բռնություններով ու ջրցան մեքենաներով։

«Վրացական երազանքը» երես թեքելով Եվրոպայից, սառեցրեց և փաստացի դադարեցրեց Վրաստանի՝ Եվրամիությանն անդամակցելու գործընթացը։ «Վրացական երազանքի» գնալով ավտորիտար քաղաքականության պատճառով մենք Եվրամիությունում այժմ պետք է քննարկենք Վրաստանի անդամակցության գործընթացի պաշտոնական կասեցման հարցը։

2023 թվականի դեկտեմբերին Վրաստանին թեկնածու երկրի կարգավիճակ շնորհելը կապված էր որոշակի բարեփոխումների հանձնառության հետ։ Այս մասին միշտ էլ իմացել են «Վրացական երազանքի» առաջնորդները։ Այնուամենայնիվ, առաջընթացի փոխարեն մենք տեսնում ենք անհանգստացնող հետընթաց. միջազգային դիտորդների կողմից խիստ քննադատության ենթարկված ընտրություններ, ցուցարարների նկատմամբ չափից դուրս բռնություններ, այսպես կոչված թափանցիկության մասին օրենքը և LGBTQI+ իրավունքների սահմանափակումները։ Այստեղ «Վրացական երազանքը» մսխում է այն պատմական հնարավորությունը, որը Եվրամիությունը առաջարկում է երկրին»,- ասված է Գերմանիայի արտաքին գործերի նախարարի հայտարարության մեջ։

Ըստ Անալենա Բերբոքի, վերջին շաբաթների և ամիսների ընթացքում «Վրացական երազանքը» կամաց-կամաց ավելի է հեռացրել երկիրը Եվրամիությունից և դրանով իսկ լուրջ վտանգ է ներկայացնում Գերմանիայի հետ Վրաստանի երկարաժամկետ գործընկերության համար։

«Արդյունքում մենք կրճատել ենք համագործակցությունը երկրի իշխանությունների հետ և դադարեցրել 200 միլիոն եվրոյից ավելի աջակցության ծրագրերը։ Միևնույն ժամանակ, Եվրամիության մեր գործընկերների հետ միասին մենք կքննարկենք լրացուցիչ քայլեր՝ սկսած վրացի առաջնորդների համար առանց վիզայի ռեժիմի կասեցումից և վերջացրած նպատակային պատժամիջոցների կիրառմամբ։

Այժմ գնդակը «Վրացական երազանքի» առաջնորդների դաշտում է։ Այժմ նրանց խնդիրն է ամեն ինչ անել խորը քաղաքական ճգնաժամին վերջ տալու, վստահությունը վերականգնելու և վրաց ժողովրդին ԵՄ անդամակցության ճանապարհին վերադառնալու իրական հեռանկարներ առաջարկելու համար, բայց նախևառաջ բոլոր վրացիների լավ ապագայի համար»,- ասել է Բերբոքը։

Նոյեմբերի 28-ին՝ խորհրդարանական ընտրություններից մեկ ամիս անց, Վրաստանի ոչ լեգիտիմ վարչապետ Իրակլի Կոբախիձեն հայտարարեց, որ «Վրացական երազանքը» մինչև 2028 թվականի վերջը օրակարգ չի մտցնի ԵՄ-ին անդամակցության շուրջ բանակցություններ սկսելու հարցը և կհրաժարվի ԵՄ բյուջետային ֆինանսավորումից։ «Վրացական երազանքի» այս որոշմանը հաջորդեցին զանգվածային ցույցեր Թբիլիսիում և մարզերում։