Նոյեմբերի 29-30-ը Թբիլիսիի Ռուսթավելիի պողոտայում տեղի ունեցած բողոքի ցույցի ժամանակ վարչական կարգով բերման է ենթարկվել 107 մարդ։ ՆԳՆ-ն նրանց մեղադրում է ոստիկանի պահանջին չենթարկվելու և մանր խուլիգանության մեջ։
Լրահոս
Ընթերցողի ընտրանի
- 1 Ես կտրականապես դեմ էի առանց վիզայի ռեժիմի կասեցմանը, բայց փոխեցի իմ դիրքորոշումը․ Ռոթ
- 2 Կոբախիձեի խոսքով՝ պետական ծառայողները և ուսուցիչները ընթերցանության ընկալման խնդիր ունեն
- 3 Խորհրդարանն այլևս գոյություն չունի, քանի որ մի կուսակցություն տապալեց սահմանադրությունը. Զուրաբիշվիլի
- 4 Եվրախորհրդարանը պահանջում է պատժամիջոցների ենթարկել «Երազանքի» առաջնորդներին և նոր ընտրություններ անցկացնել Վրաստանում
- 5 ԵՄ-ն ընտրություններն ուսումնասիրելու համար առաքելություն կուղարկի Վրաստան և կչեղարկի կառավարությանը տրվող 121 միլիոնի օգնությունը
- 6 Աղմկոտ նիստից հետո ԿԸՀ-ն հաստատեց ընտրությունների ամփոփիչ արձանագրությունը
ՆԳՆ-ն ցրել է հանրահավաքը՝ օգտագործելով ջրցան մեքենաներ, արցունքաբեր գազ, ռետինե փամփուշտներ և այլ հատուկ միջոցներ։ Դիմակավորված ոստիկաններն ու հատուկ նշանակության ջոկատի աշխատակիցները հետապնդել, ֆիզիկական բռնության են ենթարկել և մինչև առավոտ բերման են ենթարկել ցուցարարներին։ Սոցցանցերում շրջանառվում են քաղաքացիների նկատմամբ դաժան ու անմարդկային վերաբերմունքը պատկերող մի շարք տեսանյութեր։
Ներքին գործերի նախարարությունը հանրահավաքի մասնակիցներին մեղադրում է ոստիկանների նկատմամբ անօրինական գործողություններ կատարելու մեջ։
«Ամբողջ գիշերվա ընթացքում հավաքի անդամները բանավոր և ֆիզիկապես բախվել են ոստիկանների հետ։ Ռուսթավելիի պողոտայում մարդիկ իրավապահների ուղղությամբ տարբեր իրեր, քարեր, պիրոտեխնիկա, ապակյա շշեր ու երկաթե առարկաներ են նետել։
Ցուցարարների բռնի գործողությունների արդյունքում տուժել է ՆԳՆ 10 աշխատակից։ Մինչ այժմ մեկ ոստիկան մարմնի տարբեր մասերում այրվածքներով շարունակում է մնալ բուժհաստատությունում։
Հասարակությունը տարբեր հեռուստաալիքներով պարզ տեսավ հանրահավաքի մասնակիցների բռնի, անօրինական գործողությունները։ Չնայած բազմաթիվ դիմումներին՝ հավաքվածները վնասել են Թբիլիսիի քաղաքապետարանի և մասնավոր անձանց ենթակառուցվածքները, խորհրդարանի պաշտպանիչ ամբարտակը, հրկիզել տարբեր իրեր և լարեր, կանգնեցրել բարիկադներ, վնասել խորհրդարանի մուտքի դարպասը և տեսահսկման տեսախցիկները հարակից տարածքում։
ՆԳՆ աշխատակիցները կարգուկանոնը վերականգնելու նպատակով կիրառել են օրենքով սահմանված հատուկ միջոցներ»,- նշված է ՆԳՆ տարածած հաղորդագրության մեջ։
Ցույցերը Թբիլիսիում և շրջաններում սկսվել են ոչ լեգիտիմ վարչապետ Իրակլի Կոբախիձեի՝ նոյեմբերի 28-ին արած հայտարարությամբ, թե «Վրացական երազանքի» կառավարությունը մինչև 2028 թվականի վերջը չի պատրասվում անդամակցության բանակցություններ սկսել և հրաժարվում է ԵՄ բյուջետային դրամաշնորհներից։
Ներքին գործերի նախարարությունը ցրել է նաև նոյեմբերի 28-29-ի բողոքի ցույցը։ Ընդհանուր առմամբ երկու օրվա ընթացքում ձերբակալվել է ակցիայի 150 մասնակից։
