Եվրախորհրդարանը պահանջում է պատժամիջոցների ենթարկել «Երազանքի» առաջնորդներին և նոր ընտրություններ անցկացնել Վրաստանում

Եվրախորհրդարանի կայքում հրապարակված հայտարարության համաձայն՝ հոկտեմբերի 26-ի ընտրությունները, որոնք ոչ ազատ են եղել, ոչ արդար, երկրի շարունակվող ժողովրդավարական նահանջի հերթական դրսևորումն են, որի պատասխանատվությունն ամբողջությամբ կրում է իշխող կուսակցությունը՝ «Վրացական երազանքը»։

Եվրախորհրդարանի պատգամավորները դատապարտում են բազմաթիվ և լուրջ ընտրախախտումները, ներառյալ ընտրողներին ահաբեկելու, ձայների մանիպուլյացիայի, դիտորդներին և լրատվամիջոցներին խանգարելու փաստագրված դեպքերը, ինչպես նաև էլեկտրոնային քվեարկության մեքենաների մանիպուլյացիայի մասին հաղորդումները: Նրանց կարծիքով, Վրաստանի Կենտրոնական ընտրական հանձնաժողովի հրապարակած քվեարկության արդյունքները «վրաց ժողովրդի կամքի վստահելի արտահայտություն չեն»։

Արդյունքում Եվրախորհրդարանը հրաժարվում է հոկտեմբերի 26-ի ընտրությունների ցանկացած ճանաչումից և կարծում է, որ նույնը պետք է անի միջազգային հանրությունը։ Եվրախորհրդարանի պատգամավորները ցանկանում են, որ նոր ընտրություններ կայանան մեկ տարվա ընթացքում՝ միջազգային սերտ վերահսկողությամբ և անկախ ընտրական վարչակազմով:

Եվրախորհրդարանն աջակցում է ընտրական մանիպուլյացիաների վերաբերյալ անկախ միջազգային հետաքննության կոչերին։ Նա կարծում է, որ Եվրամիությունը և նրա անդամ երկրները պետք է անձնական պատժամիջոցներ սահմանեն Վրաստանի այն քաղաքական առաջնորդների նկատմամբ, ովքեր պատասխանատու են ժողովրդավարության հետընթացի, ընտրական օրենսդրության և չափանիշների խախտման, ինչպես նաև պետական ​​ինստիտուտների չարաշահման համար։

Եվրախորհրդարանը պահանջում է պատժամիջոցների ենթարկել վարչապետ Իրակլի Կոբախիձեի, Թբիլիսիի քաղաքապետ և «Վրացական երազանքի» գլխավոր քարտուղար Կախա Կալաձեի, խորհրդարանի նախագահ Շալվա Պապուաշվիլիի, «Վրացական երազանքի» նախագահ Իրակլի Ղարիբաշվիլիի, նախկին վարչապետ և օլիգարխ Բիձինա Իվանիշվիլիի դեմ։

Եվրախորհրդարանի պատգամավորները նաև կոչ են անում Եվրամիությանը խստորեն սահմանափակել ԵՄ մակարդակով պաշտոնական շփումները Վրաստանի կառավարության և խորհրդարանի հետ: Միևնույն ժամանակ, նրանք հստակ նշում են, որ Եվրամիությանը Վրաստանի ինտեգրման գործընթացը փաստացի դադարեցվել է վերջերս հակադեմոկրատական ​​օրենսդրության, այդ թվում՝ «Օտարերկրյա ազդեցության թափանցիկության մասին» օրենքի ընդունման պատճառով։

Եվրախորհրդարանը կտրականապես դատապարտում է Ռուսաստանի համակարգված միջամտությունը Վրաստանի ժողովրդավարական գործընթացներին այնպիսի ապատեղեկատվության միջոցով, ինչպիսին է «Գլոբալ պատերազմի կուսակցության» դավադրությունը, ըստ որի՝ Արևմուտքի թելադրանքով ընդդիմությունը երկիրը ներքաշելու է Ռուսաստանի հետ պատերազմի մեջ։

Եվրախորհրդարանի պատգամավորները խստորեն զգուշացնում են Վրաստանի իշխանություններին, որ օրինական ձևավորված քաղաքական կուսակցություններին արգելելու ցանկացած փորձ ավելի կհեռացնի երկիրը Եվրամիությունից և անհնարին կդարձնի անդամակցությունը: Նրանք նաև նշում են, որ «Վրացական երազանքի» վարած քաղաքականությունը անհամատեղելի է Վրաստանի եվրատլանտյան ինտեգրման հետ։

«Խորհրդարանական ընտրություններից հետո Վրաստանում սրվող ժողովրդավարական ճգնաժամի և ենթադրյալ ընտրակեղծիքների մասին» բանաձևը մշակվել է Եվրախորհրդարանի հինգ խմբերի կողմից՝ Եվրոպական ժողովրդական կուսակցություն (ԵԺԿ), Կանաչների և Սոցիալիստների և Դեմոկրատների դաշինք (S&D), Եվրոպական պահպանողականներ և ռեֆորմիստներ (ECR), Նորացնել Եվրոպան (Renew Europe) և Կանաչներ (Verts/ALE):