«Գախարիան՝ հանուն Վրաստանի» կուսակցությունը ներկայացրել է ընտրական ցուցակը

Ինչպես հայտարարել է Գիորգի Գախարիան, այս ընտրություններում իր կուսակցության քաղաքական նպատակն է օգնել քաղաքացիներին հաղթահարել արմատականացումը և երկբևեռությունը։

«Սա ամենամեծ մարտահրավերն է, որն այսօր խոչընդոտում է երկրի զարգացմանը և այն ետ է տանում անցյալ։ Ուստի բոլորս պետք է հասկանանք, թե որքան պատասխանատվություն է գնալ ընտրությունների, չքվեարկել «Երազանքի» օգտին, չքվեարկել «Ազգային շարժման» օգտին և քվեարկել հանուն երկրի եվրոպական ապագայի, երկրի զարգացման, ազնվության, և ամենակարևորը, հանուն երկրի ազգային շահերի պաշտպանության։

Այս ընտրություններում մեր հիմնական նպատակն ու կարգախոսն է լինելու՝ «Ո՛չ «Երազանքին», ո՛չ «Ազգային շարժմանը»։ Խաղաղություն Վրաստանին և պաշտպանենք իրական խաղաղությունը»... պայքարենք երկրի առաջընթացի համար և ամենակարևորը՝ պայքարենք այս երկիրը իրական խաղաղությամբ, իրական արժանապատվությամբ և բարգավաճմամբ հասցնելու ազգային և եվրոպական զարգացման տրամաբանական ուղուն, դեպի այն ուղուն, որը եղել է մեր նախնիների նպատակը և այսօր մեր երեխաների երազանքն է»,- ասել է Գախարիան։

«Գախարիան՝ հանուն Վրաստանը» ներկայացրել է 29 թեկնածուի։ Ընտրական ցուցակի առաջին 10 թեկնածուներն են՝

1. Գիորգի Գախարիա - «Հանուն Վրաստանի» կուսակցության նախագահ,
2. Նաթիա Մեզվրիշվիլի - «Հանուն Վրաստանի» կուսակցության փոխնախագահ,
3. Դիմիտրի Ցկիտիշվիլի - դիվանագետ, տնտեսագետ, IX գումարման խորհրդարանի պատգամավոր (2016-2020) «Վրացական երազանքից»,
4. Կախաբեր Քեմոկլիձե - «Հանուն Վրաստանի» կուսակցության քաղաքական քարտուղար,
5. Զվիադ Ձիձիգուրի - «Պահպանողական կուսակցության» նախագահ,
6. Զազա Թավաձե - Թբիլիսիի քաղաքային խորհրդի անդամ «Հանուն Վրաստանի» կուսակցությունից, Սահմանադրական դատարանի նախկին նախագահ,
7. Անա Բուչուկուրի - «Հանուն Վրաստանի» կուսակցության քաղխորհրդի անդամ, 10-րդ գումարման խորհրդարանի պատգամավոր,
8. Բերդիա Սիճինավա - «Հանուն Վրաստանի» կուսակցության գործադիր քարտուղար,
9. Ռոին Քոչորաշվիլի - «Հանուն Վրաստանի» կուսակցության անդամ, Վրաստանի հավաքականի կիսապաշտպան Գիորգի Քոչորաշվիլիի հայրը,
10. Բեքա Լիլուաշվիլի - «Հանուն Վրաստանի» կուսակցության քաղաքական խորհրդի անդամ, 10-րդ գումարման խորհրդարանի պատգամավոր։

«Գախարիան՝ հանուն Վրաստանի» կուսակցությունն անկախ է մասնակցում խորհրդարանական ընտրություններին։ Միավորվելու շուրջ բանակցությունները, որոնք նախագահի միջնորդությամբ վարում էին Գիորգի Գախարիան և «Ուժեղ Վրաստան» կոալիցիայի առաջնորդ Մամուկա Խազարաձեն, նախորդ շաբաթ ավարտվեցին առանց համաձայնության։