Գիորգի Գախարիայի վրա հարձակման գործով հետաքննություն է սկսվել բռնության հոդվածով

Ընդդիմադիր կուսակցության առաջնորդին և նախկին վարչապետին ծեծի են ենթարկել ուշ գիշերը՝ ժամը 02։00-ի սահմաններում, «Շերատոն» հյուրանոցում։ «Վրաստանի լուրերի» տեղեկություններով՝ նրա վրա հարձակվել են «Վրացական երազանքի» անդամները, այդ թվում՝ ոչ լեգիտիմ խորհրդարանի պատգամավոր Դիտո Սամխարաձեն և Աջարիայի Գերագույն խորհրդի պատգամավոր Գիորգի Մանվելիձեն։ Մինչ այդ նրանց հարձակման թիրախ է դարձել «Թրանսփարենսի Ինթերնեշնլ-Վրաստան»-ի աշխատակից, լրագրող Զվիադ Քորիձեն։

Գիորգի Գախարիան, ով հարձակման պահին եղել է միայնակ, շտապօգնության բրիգադով տեղափոխվել է Բաթումիի հանրապետական ​​հիվանդանոց։ Ըստ հերթապահ բժշկի՝ նա ստացել է քթի ոսկորի կոտրվածք, ուղեղի ցնցում։

Շատ շնորհակալ եմ ձեզանից յուրաքանչյուրին աջակցության համար: Առողջական առումով նորմալ եմ։ Այսօր առաջին հերթին ապօրինի բանտարկյալները մեր աջակցության կարիքն ունեն։ Մնացածը՝ հետո»,- գրել է Գախարիան Facebook-ում։

Ոստիկանությունը «Շերատոն» հյուրանոց է ժամանել մոտ մեկ ժամ ուշացումով։ «Հանուն Վրաստանի» փոխնախագահ Նաթիա Մեզվրիշվիլիի խոսքով՝ հանցագործության վայրի պարագծը դիտավորյալ չի պաշտպանվել, ինչը վկայում է ՆԳ նախարարության աշխատակիցների կողմից ապացույցների ոչնչացման մասին։