«Գիրչին» նոր ընտրությունների անցկացման պահանջով նոյեմբերի 9-ին հանրահավաք կանցկացնի

«Գաղտնիության տոտալ խախտման հիման վրա պետք է նշանակել նոր ընտրություններ, և ԿԸՀ-ին մեկշաբաթյա ժամկետ տալ այս պահանջը կատարելու համար։ Մենք կոչ ենք անում մեր արևմտյան գործընկերներին չճանաչել այս ընտրությունների արդյունքները։

Շաբաթ օրը ժամը 19:00-ին եկեք խորհրդարանի դիմաց հանրահավաքի, աջակցեք մեզ և միացեք մեր ծրագրին, որպեսզի կեղծ հեղափոխության փոխարեն շարունակենք պայքարը նոր ընտրությունների համար»,- ասվում է «Գիրչի» կուսակցության հայտարարության մեջ։

Հոկտեմբերի 26-ի խորհրդարանական ընտրություններում, ըստ ԿԸՀ-ի տվյալների, «Գիրչին» ստացել է ձայների 2,9 տոկոսը (62 223 ընտրող) և չի հաղթահարել 5 տոկոսանոց ընտրական շեմը։

ԿԸՀ տվյալներով՝ «Վրացական երազանքի» օգտին քվեարկել է ընտրողների 53,93%-ը (1 120 011 ընտրող)։ Այս արդյունքի լեգիտիմությունը չեն ճանաչում ընտրական շեմը հաղթահարած ընդդիմադիր կուսակցությունները, որոնց միջև ձայները բաշխվել են հետևյալ կերպ.

• «Կոալիցիա հանուն փոփոխությունների» - (11.037%)
• «Միասնություն-Ազգային շարժում» - (10․164%)
• «Ուժեղ Վրաստան» - (8․814%)
• «Գախարիան հանուն Վրաստանի» - (7․771%)

Նախագահ Սալոմե Զուրաբիշվիլին նույնպես կարծում է, որ ընտրությունները «ամբողջովին կեղծվել են», իսկ Վրաստանը «ռուսական հատուկ գործողության» զոհ է դարձել։