Գլդանիի բանտից ծանր վնասվածքներով կլինիկա տեղափոխված կալանավորը մահացել է

«Նա նույն մակարդակի վնասվածքներ կստանար, եթե տասներորդ հարկից ընկներ։ Սա արվել է հատուկ քրեակատարողական ծառայության կողմից։ Ես այլ տպավորություն չունեմ։ Քրեակատարողական ծառայությունը պարտավոր էր պաշտպանել նրան։ Երբ այս փաստը տեղի ունեցավ, նրանք այն թաքցրին 48 ժամ, ո՛չ փաստաբանը, ո՛չ էլ ընտանիքի անդամը տեղյակ չէին։ Խցակիցը զանգահարել է փաստաբանին, որ Իոսեբին դուրս են բերել և այլևս չեն վերադարձնի։ Մինչ այդ մենք ոչինչ չգիտեինք», - ասել է մահացածի եղբայրը՝ Շոթա Գորգաձեն։

Հատուկ քրեակատարողական ծառայության տվյալներով՝ բանտարկյալ Իոսեբ Գորգաձեի նկատմամբ ճնշում կամ բռնություն չի եղել։ Ծառայությունը հրապարակել է քրեակատարողական հիմնարկում հունվարի 14-ից մինչև հունվարի 23-ը նկարահանված տեսաերիզի մի մասը, որի համաձայն՝ հունվարի 23-ին, ժամը 14:25-ին, աշխատակիցները արագ մտել են խուց։ 2 րոպեի ընթացքում խուց են մտնում բժիշկը և բուժքույրը։ Ժամը 14:51-ին բանտարկյալին պատգարակի վրա դուրս են բերում խցից։ Ժամը 15:00-ին կենտրոն է ժամանել շտապօգնության բժշկական խումբ։ Ժամը 15:21-ին կալանավորին շտապօգնության մեքենայով տեղափոխում են պատգարակի վրա, իսկ ժամը 15:58-ին նրան ընդունում են Վիվամեդ կլինիկայում։ Պարզվում է, որ խցում տեսահսկողություն չի եղել։

Բանտարկյալի փաստաբան Մուխրան Ղուրցկայան ասում է, որ անկախ փորձաքննության եզրակացության համաձայն՝ Իոսեբ Գորգաձեն գլխի և մարմնի վնասվածքներ է ստացել «բութ առարկաներով բազմակի հարվածներից»։

«Հետաքննությունը շարունակվում է մոտ 4 ամիս, բայց արդյունքներ չկան։ Ոչ ոքի մեղադրանք չի առաջադրվել, ոչ էլ ձերբակալվել։

Հետաքննությունն ունի վարկած, որ Իոսեբ Գորգաձեն, ենթադրաբար, ընկել է և ստացել այդ վնասվածքները։ Նա գլխի և դեմքի ավելի քան 30 վնասվածք ուներ։ Անհավանական է, որ նա կարող էր այս վնասվածքները ստանալ մեկ անգամ ընկնելուց

Անհավանական է, որ միայն կալանավորները կարող էին դա անել։ Հավանական է, որ բանտի աշխատակիցների մատը խառնված է», - ասել է փաստաբանը TV Pirveli-ի եթերում։

Վիվամեդ կլինիկայի կլինիկական տնօրեն Զուրաբ Չխաիձեի խոսքով՝ կալանավորը կաթված չի ստացել, և նրա մահը վրա է հասել բազմաթիվ վնասվածքներից և գլխուղեղի տրավմայից։

Ավելի ուշ տարածվել է Իոսեբ Գորգաձեի «Ձև 100» առողջապահական ձևաթուղթը, որը պատրաստվել է «Վիվամեդ» կլինիկայի կողմից։ Փաստաթղթում նշվում է, որ Գորգաձեն ունեցել է հետևյալ վնասվածքները․ ուղեղի ցնցում, տրավմատիկ սուբդուրալ հեմատոմա, աչքի և ակնակապիճի այլ վնասվածքներ, գանգի կոտրվածք, դեմքի ոսկորի կոտրվածք, գանգի և դեմքի ոսկորի չճշտված կոտրվածք, գլխի վնասվածք, արյունահոսություն կամ հեմատոմա, բժշկական մանիպուլյացիայի այլ բարդություններ, կոմա, գլխուղեղի անօքսիկ վնասվածք և այլն։

«Իոսեբ Գորգաձեն ընկել և գլխին հարված է ստացել։ Հետաքննությունը կպարզի, թե ինչու է զեկույցում նման բան ասվել [30 վնասվածք]։ Տեսե՞լ եք կադրերը։ Ի՞նչ եք ասում, մենք հիվանդի դեմքը զարդարե՞լ ենք, երբ նրան հոսպիտալացրել են։ Հետաքննությունն ունի ամբողջական արձանագրություն և կվերանայի այն», - ասել է «Վրացական երազանքի» արդարադատության նախարար Պաատա Սալիան։

46-ամյա Իոսեբ Գորգաձեն ձերբակալվել է անցյալ տարվա հոկտեմբերի 24-ին՝ Ծալկայի ճանապարհին տեղի ունեցած վթարի հետ կապված։ Ներքին գործերի նախարարության տվյալներով՝ մոտավորապես ժամը 02:00-ին Ծալկայից Կոդա գյուղ մեկնող «Ֆորդ» մակնիշի ավտոմեքենան, որը վարում էր 1979 թվականին ծնված Իոսեբ Գորգաձեն, բախվել է չորս քաղաքացիների, որոնք դուրս էին եկել մոտակայքում կայանված երկու մեքենաներից և վերադառնում էին Թբիլիսիում տեղի ունեցած «Վրացական երազանքի» հանրահավաքից։ Վթարի հետևանքով երեք մարդ մահացել է տեղում, իսկ չորրորդը՝ հիվանդանոցում։