Հայաստանում հայտնաբերվել է Վրաստանի տարածքով ներկրված մեկ տոննա կոկաին

Գերատեսչության հայտարարությամբ՝ 2023 թվականի մայիսի 13-ին հարուցված քրեական գործի շրջանակներում ձեռնարկված քննչական գործողությունների արդյունքում պարզվել է, որ Հայաստանում գործող և մրգերի ներմուծմամբ զբաղվող ընկերության կողմից Էկվադորում գտնվող ընկերությունից պատվիրված ապրանքատեսակի հետ տարանցիկ երկրների՝ Պանամայի, Իտալիայի և Վրաստանի տարածքով Հայաստան է ներմուծվել մեծ քանակությամբ կոկաին, որը հայտնաբերվել և գտնվում է ազգային անվտանգության ծառայությունում: Դրա շուկայական արժեքը կազմում է մոտ 250 մլն եվրո։

Հայաստանի ազգային ​​անվտանգության ծառայությունը չի նշում ո՛չ պատվիրատուի, ո՛չ էլ մատակարարողի անունը։ Գերատեսչությունը չի նշում, թե արդյոք այս դեպքը կապ ունի Իտալիայում բացահայտված խոշոր թմրանյութերի հանցագործության հետ։

Երեկ՝ մայիսի 16-ին, միջազգային լրատվամիջոցներում տեղեկություն է տարածվել, որ Իտալիայի հարավային Ջոյա Տաուրո նավահանգստում ոստիկանությունը առգրավել է 800 մլն եվրո արժողությամբ 2,7 տոննա կոկաինով բեռնված նավ։ Կոկաինի փաթեթները թաքցված են եղել 12 մետրանոց բանանի կոնտեյներներում: Բեռը հայտնաբերվել է Էկվադորից ժամանած նավի վրա, որը Բաթումիի նավահանգստով պետք է տեղափոխվեր Հայաստան։