Հետաքրքիր է, թե ՍԴ դատավորները ինչպես կմտնեն պատմության մեջ. Զուրաբիշվիլի

«Այս դեպքում պետք է օրինակ բերել, որ կարելի է պայքարը շարունակել մինչև վերջ։ Չի կարելի կանգ առնել և Սահմանադրական գերագույն դատարանի առաջ հարց չբարձրացնել, թե արդյո՞ք նրանք կարծում են, որ այս օրենքը հակասում է, կամ չի հակասում մեր եվրոպական ինտեգրումը երաշխավորող հոդվածին։ Իմ իմպիչմենտի դատավարությունը հետաքրքիր էր նրանով, որ հայտնվեցին երեք դատավորներ, ովքեր համարձակվեցին ասել, որ համաձայն չեն... Ի դեպ, նրանց եզրակացությունները տարածվեցին արտերկրում և բարձր գնահատվեցին, քանի որ դրանք շատ լուրջ աշխատանք էին։

Այստեղ նույնպես մենք նրանց հնարավորություն ենք տվել իրենց կարծիքն արտահայտել մեր ողջ հասարակությանն ու գործընկերներին հուզող հարցի վերաբերյալ, և ինձ շատ է հետաքրքրում, թե ինչպես են մեր Սահմանադրական դատարանի դատավորները մտնելու պատմության մեջ»,- ասել է Սալոմե Զուրաբիշվիլին։

Վրաստանի նախագահը մի քանի օր առաջ դիմել է Սահմանադրական դատարան։ 69 էջանոց հայցով նախագահը պնդում է, որ ռուսական օրենքը և դրա առանձին նորմերը հակասում են սահմանադրության վեց հոդվածների. Հոդված 22 - Միավորման ազատություն, Հոդված 15 - Անձնական և ընտանեկան կյանքի, անձնական տարածության և հաղորդակցության անձեռնմխելիության իրավունքներ, Հոդված 17. Կարծիքի, տեղեկատվության, զանգվածային լրատվության միջոցների և համացանցի ազատության իրավունքներ, Հոդված 12 - Անձի ազատ զարգացման իրավունք, Հոդված 31, 9-րդ կետի 2-րդ նախադասություն․ «Օրենքը, եթե այն չի նվազեցնում կամ վերացնում պատասխանատվությունը, հետադարձ ուժ չունի»։ Սալոմե Զուրաբիշվիլին պահանջում է կասեցնել ռուսական օրենքը՝ մինչև գործի վերաբերյալ որոշում կայացվելը։ Սահմանադրական դատարանը հայցը վարույթ է ընդունել։