Իսրայելը ՄԱԿ-ի գլխավոր քարտուղար Անտոնիո Գուտերեշին պերսոնա նոն գրատա է հայտարարել

«Այսօր ես Իսրայելում պերսոնա նոն գրատա հայտարարեցի ՄԱԿ-ի գլխավոր քարտուղար Անտոնիո Գուտերեշին և արգելեցի նրա մուտքը երկիր։ Յուրաքանչյուր ոք, ով չի կարող միանշանակ դատապարտել Իրանի նողկալի հարձակումն Իսրայելի վրա, ինչպես դա անում են աշխարհի գրեթե բոլոր երկրները, իսրայելական հող ոտք դնելու իրավունք չունի:

Սա մի գլխավոր քարտուղար է, որը դեռ պետք է դատապարտի հոկտեմբերի 7-ին ՀԱՄԱՍ-ի մարդասպանների կողմից իրականացված ջարդերն ու սեռական ոճրագործությունները, ոչ էլ ջանք է գործադրել դրանք ահաբեկչական կազմակերպություն հռչակելու համար:

Գլխավոր քարտուղարը, ով աջակցում է ՀԱՄԱՍ-ի, Հեզբոլլահի, Հութիների և այժմ Իրանի՝ համաշխարհային ահաբեկչության աղբյուր ահաբեկիչներին, ավազակներին և մարդասպաններին, բիծ կլինի ՄԱԿ-ի պատմության վրա:

Իսրայելը կշարունակի պաշտպանել իր քաղաքացիներին և ազգային պատիվը Անտոնիո Գուտերեշի հետ կամ առանց դրա», - ասվում է Իսրայել Կացի հայտարարության մեջ, որը հրապարակվել է X սոցիալական ցանցում:

Հոկտեմբերի 1-ին Իրանը զանգվածային հրթիռային հարձակում է իրականացրել Իսրայելի վրա։ Իսլամական հեղափոխության պահապանների կորպուսը հայտարարել է, որ ռազմական գործողությունը պատասխան է Իսրայելի կողմից ՀԱՄԱՍ-ի առաջնորդ Իսմայիլ Հանիեի, Հեզբոլլահի առաջնորդ Հասան Նասրալլայի և Լիբանանում Իսլամական հեղափոխության պահապանների կորպուսի հրամանատար Աբբաս Նիլֆրուշանիի սպանությանը:

Ըստ իսրայելցի պաշտոնյաների՝ հարձակման ժամանակ Իրանը 181 հրթիռ է արձակել, սակայն դրանց մեծ մասը «անհաջող է եղել»։ Վարչապետ Բենիամին Նեթանյահուի խոսքերով, Իրանը «մեծ սխալ թույլ տվեց և կվճարի դրա համար»։

ՄԱԿ-ի գլխավոր քարտուղարն արձագանքել է հոկտեմբերի 1-ին Իրանի հարձակմանը և X-ում գրել, որ դատապարտում է մերձավորարևելյան հակամարտության ընդլայնումը դրա հետագա սրմամբ։ «Սա պետք է դադարեցվի։ Մեզ բացարձակապես անհրաժեշտ է հրադադար»,- ասել է Անտոնիո Գուտերեշը։