Թեհրանում սպանվել է ՀԱՄԱՍ-ի առաջնորդներից Իսմայիլ Հանիեն

Իսլամիստական ​​խմբավորման տարածած հայտարարության մեջ ասվում է, որ Իսմայիլ Հանիեն սպանվել է իր նստավայրի վրա իսրայելական հարձակման հետևանքով։ Իսրայելի իշխանությունները դեռևս չեն մեկնաբանել այս հարցը։

Իրանի Իսլամական հեղափոխության պահապանների կորպուսը նույնպես հայտարարություն է տարածել Հանիեի մահվան մասին և հայտնել, որ ՀԱՄԱՍ-ի առաջնորդի հետ սպանվել է նրա թիկնապահներից մեկը։

Իսմայիլ Հանիեն զբաղեցնում էր ՀԱՄԱՍ-ի քաղբյուրոյի նախագահի պաշտոնը և ղեկավարում էր խմբավորման քաղաքական գործողությունները, այդ թվում՝ բանակցությունները։

Հանիեն Թեհրան է մեկնել մասնակցելու Իրանի նախագահ Մասուդ Փեզեշքիանիի երդմնակալության արարողությանը։ Նշված միջոցառմանը, որն անցկացվել է հուլիսի 30-ին, ներկա է եղել նաև Վրաստանի վարչապետ Իրակլի Կոբախիձեն։

Մայիսին Հաագայի Միջազգային քրեական դատարանի դատախազը պահանջել էր ՀԱՄԱՍ-ի երեք առաջնորդների, այդ թվում՝ Հանիեի ձերբակալության օրդեր տրամադրել։ Դատախազի խոսքով՝ նրանք պատասխանատու են 2023 թվականի հոկտեմբերի 7-ին Իսրայելի վրա հարձակման և հարյուրավոր Իսրայելի քաղաքացիների սպանության համար։