«Իվանիշվիլին սպառնաց ինձ բանտում ճզմել». Գիորգի Բաչիաշվիլին լքել է Վրաստանը

Ինչպես հայտնի է, Բաչիաշվիլիի անձնագիրը առգրավվել է։ 2023 թվականի հուլիսին, այսպես կոչված, բիթքոյնի գործով նրա նկատմամբ որպես խափանման միջոց է կիրառվել 2,5 մլն լարի գրավ և արգելվել է հատել սահմանը։ Հայտնի չէ, թե նա ուր է մեկնել և ինչ ճանապարհով։

«Մեծ տխրությամբ և անարդարության զգացումով հայտնում եմ Վրաստանից իմ հարկադիր հեռանալու մասին։ Հայրենիքը լքելը հեշտ ընտրություն չէ։ Թեև Իվանիշվիլիի հանցավոր ծրագիրը ի սկզբանե պարզ էր ինձ համար, այնուամենայնիվ ես ռիսկի դիմեցի և մինչև վերջ մերկացրեցի նրա իրական դեմքը։

Իվանիշվիլիի ռեժիմն ամբողջությամբ հեռացել է օրենքի և ժողովրդավարության սկզբունքներից։ Ուստի իմ հեռանալը նահանջ չէ, այլ միակ ողջամիտ լուծումը։

Մեկ այլ շինծու, ժամանակավրեպ և անօրինական գործընթաց, որն իմ դեմ հարուցվել է, ևս մեկ անգամ հաստատում է, որ Իվանիշվիլիի դատարանն այլևս գոյություն չունի Վրաստանում։ Այս անարդարությունը ղեկավարվում է պատժի ենթարկված Իվանիշվիլիի և նրա հանցախմբի կողմից, ներառյալ՝ դատավոր Գիորգի Գելաշվիլին, դատարանների ղեկավարներ Միխեիլ Չինչալաձեն և Լևան Մուրուսիձեն, գլխավոր դատախազ Գիորգի Գաբիտաշվիլին և գործի դատախազ Միխեիլ Սադրաձեն: Այս քաղաքական ռեպրեսիաների ու շորթումների մեջ ներգրավվածներից յուրաքանչյուրն արդեն արժանացել է քաղաքակիրթ աշխարհի կառավարությունների սանկցիային։ Սա իրավական համակարգ չէ, որտեղ ճշմարտությունը գերակշռում է, ոչ էլ մարդու իրավունքները պաշտպանող համակարգ է, հատկապես, երբ դուք բախվում եք Իվանիշվիլիի կոռումպացված մեքենային:

Բացի այդ, ես ստացա հավաստի տեղեկատվություն իմ անվտանգության իրական սպառնալիքների մասին՝ սպառնալիքներ, որոնք կարող են մահացու լինել այսօրվա Վրաստանում:

Բանտում ես լիովին անպաշտպան կլինեի Իվանիշվիլիի դահիճների առջև... այն բանտում, որտեղ Իվանիշվիլին սպառնում էր ինձ ճզմել։

Ես իմ համերաշխությունն եմ հայտնում հազարավոր վրացիներին, ովքեր ապօրինի բռնադատված և բանտարկված են այս ռեժիմի կողմից, և նրանց, ովքեր այսօր պայքարում են հանուն մեր երկրի ազատության և ժողովրդավարության։

Իմ հեռանալը հանձնվել չէ, այլ մտածված ու ռազմավարական քայլ։ Այս պայքարում իմ ներկայությունը շատ ավելի շահեկան կլինի։ Ցավոք սրտի, մեր հազարավոր համաքաղաքացիներ այս ընտրությունը կատարելու հնարավորություն չունեն։

Մեզ չեն կարող լռեցնել, մեզ չեն կարող կոտրել, և մեզ չեն կարող կանգնեցնել, քանի որ մենք ունենք այն, ինչ նրանք երբեք չեն ունենա՝ մենք սեր ունենք»,- գրում է Բաչիաշվիլին։

Գիորգի Բաչիաշվիլիին մեղադրանք է առաջադրվել երկու գործով։ 2023 թվականից դատախազությունը նրան մեղադրում է 39 215 820 դոլար արժողությամբ բիթքոյն յուրացնելու մեջ՝ հիմնվելով «Վրացական երազանքի» պատվավոր նախագահ Բիձինա Իվանիշվիլիի դիմումի վրա։ Մեղադրանքը հաստատվելու դեպքում Իվանիշվիլիի նախկին գործարար գործընկերոջը սպառնում է 9-ից 12 տարվա ազատազրկում:

Օրեր առաջ Բաչիաշվիլիին մեղադրանք է առաջադրվել, այսպես կոչված, Մտկվարի ՀԷԿ-ի գործով։ Տվյալ գործով նա մեղադրվում է ծառայողական պարտականությունները չկատարելու կամ ոչ պատշաճ կատարելու մեջ, ինչը ենթադրում է ազատազրկում 2-ից 5 տարի ժամկետով։ Դատախազության տվյալներով՝ Բաչիաշվիլին պատշաճ կերպով չի գնահատել ռիսկերը և միջոցներ չի ձեռնարկել վտանգներից խուսափելու համար, ինչի արդյունքում Մտկվարի ՀԷԿ-ի կառուցման արժեքը մոտ 140 միլիոն դոլարից հասել է 240 միլիոնի։ Պետական ​​մեղադրող կողմը պնդում է, որ դա վնաս է հասցրել ներդրողի, այսինքն՝ Բիձինա Իվանիշվիլիի շահերին։