ԿԸՀ-ի նախնական արդյունքներով՝ ընտրություններում 53%-ով առաջատարը «Վրացական երազանքն» է

«Այս պահին ընտրատեղամասերը չեն ավարտել իրենց գործունեությունը, ընթանում են ձեռքով հաշվարկման ընթացակարգեր։ 3111 ընտրական տեղամասերից արդիականացվել են 2263 տեղամասեր, որոնք լիովին հագեցվել են տեխնոլոգիական միջոցներով, որոնցից այս փուլում ստացվել են 2206 տեղամասերի արդյունքները, ինչը կազմում է այս թվի 97,48%-ը»,- ասել է ԿԸՀ-ի նախագահ Գիորգի Կալանդարիշվիլին։

2206 տեխնոլոգիական ընտրատարածքի տվյալներով՝ խորհրդարանական ընտրությունների նախնական արդյունքները հետևյալն են՝

• «Վրացական երազանք» - 935 004 ձայն (52․99%),
• «Փոփոխությունների կոալիցիա» - 197 619 ձայն (11․2%),
• «Միասնություն-Ազգային շարժում» - 177 510 ձայն (9․83%),
• «Ուժեղ Վրաստան» - 159 306 ձայն (9․02%),
• «Գախարիան հանուն Վրաստանի» - 145 205 ձայն (8․22%)։

Խորհրդարանական «Գիրչի» կուսակցությունը, որը, ըստ նախնական արդյունքների, ստացել է 56 980 ձայն (3,22%), ինչպես նաև «Հայրենասերների դաշինքը» (2,53%) և «Լեյբորիստական կուսակցությունը» (0,75%) չեն հաղթահարել 5 տոկոսանոց ընտրական շեմը։

Խորհրդարանական ընտրությունների համար Վրաստանում և նրա սահմաններից դուրս բացվել է 3111 ընտրատեղամաս։ Դրանցից 2263 ընտրատեղամասում քվեարկությունն իրականացվել է էլեկտրոնային տեխնոլոգիաների կիրառմամբ, իսկ 848 տեղամասերում՝ ոչ էլեկտրոնային եղանակով, այսինքն՝ հին եղանակով։

Վրաստանում մասնակցությունը կազմել է առնվազն 58,94%: Կենտրոնական ընտրական հանձնաժողովի տվյալներով՝ տեղամասերում քվեարկելու է եկել 2 060 412 ընտրող։