Կալաձեն ասել է, որ «շատ լավ հարաբերություններ ունի» Կադիրովի մտերիմ Չիմաևի հետ

Ինչպես ասել է Կալաձեն, նա իր ընկերներին քաղաքական հողի վրա չի ընտրում։

«Խամզաթն աշխարհի լավագույն, հաջողակ մարզիկներից մեկն է։ Ես նրա հետ ընկերություն եմ անում, շատ լավ հարաբերություններ ունեմ, և ընդհանրապես, ուրախ եմ, որ այսպիսի հաջողակ մարզիկներ են այցելում մեր մայրաքաղաք, մեր երկիր»,- լրագրողներին ասել է Կալաձեն։

Նրա խոսքով՝ Չիմաևը Վրաստանում է եղել զբոսաշրջային նպատակներով, և «ապագայում էլ ավելի շատ մարդիկ են գալու»։

«Մենք կիրականացնենք այնպիսի նախագծեր, որոնք հնարավորություն կտան երիտասարդներին ցուցադրել իրենց տաղանդը տարբեր մարզաձևերում և հաջողակ լինել»,- ասել է Կալաձեն։

Վրաստանում Խամզաթ Չիմաևի գտնվելու մասին հանրությանը հայտնի դարձավ դեկտեմբերի 23-ին, երբ չեչեն մարզիկը Instagram-ում մի քանի լուսանկար էր հրապարակել։ Լուսանկարներից երևում է, որ նա Կախա Կալաձեի և MMA-ի վրացի մարտիկ Գուրամ Քութաթելաձեի հետ գտնվել է Թբիլիսիի քաղաքապետարանի շենքում։ «Վրաստան, շնորհակալություն ջերմ ընդունելության համար»,- գրել է Չիմաևը։

Կախա Կալաձեից բացի Չիմաևին Թբիլիսիում հանդիպել են օլիմպիական չեմպիոններ Գենո Պետրիաշվիլին և Լաշա Բեքաուրին։ Պետրիաշվիլին «Վրացական երազանքի» ներկայացուցիչ է ոչ լեգիտիմ խորհրդարանում։

Խամզաթ Չիմաևը Չեչնիայի Հանրապետության ավտորիտար առաջնորդի մտերիմ ընկերն է։ Նրա Instagram-ում հաճախ են հանդիպում Ռամզան Կադիրովի և նրա երեխաների հետ արված լուսանկարներ։

Խամզաթ Չիմաևը՝ մականունը «Բորձի» (չեչեներեն նշանակում է «գայլ») ծնվել է Չեչնիայում 1994 թվականին, իսկ 18 տարեկանում մոր և եղբոր հետ տեղափոխվել է Շվեդիա, որտեղ մարզվել է MMA All Star ակումբում։ 2022 թվականին նա հրաժարվել է Շվեդիայի քաղաքացիությունից և այժմ Արաբական Միացյալ Էմիրությունների անունից հանդես է գալիս «Բացարձակ մարտերի առաջնության» (UFC) մրցաշարում։

Չիմաևը պարբերաբար այցելում է Չեչնիա։ 2022 թվականին նա ամուսնացել է Գրոզնիում։ Արարողության գլխավոր հյուրն էր Չեչնիայի ղեկավարը։

2023 թվականի սեպտեմբերին Չիմաևը հրապարակել է Ռամզան Կադիրովի հետ արված լուսանկարը և ասել, որ նա ներկայացնում է «Ախմատ» մարտական ​​ակումբը։ Այս ակումբը հիմնադրվել է Կադիրովի կողմից 2014 թվականին։

«Այս մարդն ինձ օգնեց, որ կյանք վերադառնամ։ Ոչ միայն ինձ, ամբողջ չեչեն ժողովրդին: Ուզում եմ շնորհակալություն հայտնել նրան այն ամենի համար, ինչ նա արել և անում է մեր ժողովրդի համար»,- գրել է Չիմաևը Instagram-ում։