Կախեթիում օտարերկրացի կին է սպանվել

Սպանված կինը Ուզբեկստանի քաղաքացի է։ Ըստ տեղացիների՝ նա վերք է ունեցել գլխի հատվածում։ Ենթադրվում է, որ կնոջը նախ հարվածել են բութ առարկայով, ապա նետել Իորի գետը։

Դին ուղարկվել է փորձաքննության։ ՆԳՆ տեղեկատվության համաձայն՝ դեպքի առթիվ հետաքննություն է սկսվել քրեական օրենսգրքի 108-րդ հոդվածով, որը նշանակում է կանխամտածված սպանություն։

Անցյալ տարի Վրաստանում սպանվել է 21 կին, սպանության փորձ է կատարվել 19 կնոջ նկատմամբ։

2014-2022 թվականներին գրանցվել է 186 կանանց սպանության դեպք։ Ընտանեկան պատճառներով սպանվել է 92 կին, այլ պատճառներով՝ 94։ Նույն ժամանակահատվածում գրանցվել է կանանց սպանության փորձի 129 դեպք, որից 79-ը՝ ընտանեկան, 50-ը՝ այլ պատճառներով։

Գենդերային կամ ընտանեկան պատճառներով կնոջ կանխամտածված սպանությունը պատժվում է 16-ից 20 տարի ժամկետով կամ ցմահ ազատազրկմամբ։