Քննչական ծառայությունը խուզարկություն է իրականացնում նաև Վալերի Տղեշելաշվիլիի Քութայիսիի տանը

«Վերջին 10 տարին Վրաստանում չեմ եղել, մի քանի ամիս առաջ եմ եկել ու ծնողներիս տանն եմ։ Ես շոկի մեջ եմ։ Քննիչը թղթի վրա գրել է, որ պետք է խուզարկություն կատարի, քանի որ կասկածում է, որ ես զբաղվում եմ քոլ ցենտրերի հետ կապված գործունեությամբ։ Ես կապ չեմ ունեցել քոլ ցենտրերի հետ։ Ես հիմնականում կրթական և տեղեկատվական տեխնոլոգիաների ոլորտում եմ, զբաղվում եմ գնումների համակարգերով: Ես երբեք կապ չեմ ունեցել քոլ ցենտրերի հետ։ Այն, ինչին նրանք ցանկանում են հասնել, մարդկանց վախեցնելն է։ Մեր ընտանիքը «քոցերի» կողմնակից չէ և երբեք էլ չի եղել»,- ասել է Տղեշելաշվիլին։

Նրա խոսքով՝ քննչական ծառայության աշխատակիցները Քութայիսիի քաղաքապետարանից երկու վկա են բերել և խուզարկության վերաբերյալ դատարանի որոշումը չեն ներկայացրել։

Այսօր՝ հոկտեմբերի 24-ի առավոտյան, ֆինանսների նախարարության քննչական ծառայության աշխատակիցները մտել են ամերիկյան Atlantic Council հասարակական կազմակերպության վրացի աշխատակիցներ Էթո Բուզիաշվիլիի և Սոփո Գելավայի բնակարանները, որտեղից տարել են նոութբուքեր և հեռախոսներ։ Բուզիաշվիլին և Գելավան հետաքննում են ռուսական ապատեղեկատվությունը։ Բացի այդ, Սոփո Գելավայի ամուսինը՝ Գիորգի Նոնիաշվիլին, «Ֆեդերալիստներ» կուսակցության քաղխորհրդի անդամ է։

«Առավոտյան ժամը 8-ի սահմաններում եկան։ Ինձ չեն ասել, որ ֆինանսական ոստիկանությունից են։ Ասացին, որ գազի տեսչության ծառայությունից են, խնդիրն ինչ-որ արտահոսք է։ Մոտ 6 հոգի ներխուժեցին, սկսեցին ուղիղ խուզարկություն, հանեցին հեռախոսը, ինձ փաստաբան կանչելու հնարավորություն չտվեցին։ Նրանք հետաքրքրված էին փաստաթղթերով և տեխնիկայով, դա էր նրանց շարժառիթը: Սկսվեցին որոնումները։ Այն տևեց մոտ երկու ժամ, իսկ մնացած երկու ժամը ծախսվեց արձանագրության նախապատրաստման վրա։ Ինձ կանչել են հարցաքննության»,- ասել է Էթո Բուզիաշվիլին։

Նրա փաստաբանի տեղեկություններով՝ Ֆինանսների նախարարության քննչական ծառայությունը հետաքննություն է վարում խարդախության, հարկերից խուսափելու և փողերի լվացման մեղադրանքով։

Քննչական ծառայության աշխատակիցները խուզարկություն են իրականացնում նաև ամերիկյան Concentrix Georgia ընկերության գրասենյակում, որը գտնվում է Թբիլիսիի Վակե թաղամասում։ Concentrix Georgia-ն խորհրդատվական ծառայություններ է մատուցում արտերկրում խոշոր բիզնես ընկերություններին: