Կոբախիձեն պատասխանել է հարցին, թե ինչու ՄԱԿ-ում ունեցած ելույթի ժամանակ չի հիշատակել Ռուսաստանը

«Խոսվել է օկուպացիայի մասին, Աբխազիայի ու Ցխինվալիի շրջանի մասին։ Մենք խոսեցինք բոլոր թեմաներից, եթե ուշադիր լսել եք։ ... [Վրաստանի տարածքները] օկուպացված են Ռուսաստանի Դաշնության կողմից, սա շատ լավ գիտեն բոլորը։ Ի դեպ, մենք չենք կարող դա ընդունել տալ Եվրամիությանը... Ես հո խոսե՞լ եմ օկուպացիայի մասին»,- ասել է Կոբախիձեն։

Հարցին, թե արդյոք Ռուսաստանը օկուպանտ է, վարչապետն ասել է. «Ռուսաստանը օկուպացրել է Վրաստանի տարածքների 20 տոկոսը։ Սա, իհարկե, փաստ է, որը ոչ ոք չի հերքում»:

Սեպտեմբերի 25-ին Վրաստանի վարչապետը ելույթ է ունեցել ՄԱԿ-ի Գլխավոր ասամբլեայի 79-րդ նստաշրջանում և կենտրոնացել խաղաղության կարևորության վրա։ Իրակլի Կոբախիձեն հայտարարել է, որ Ուկրաինայում շարունակվող պատերազմը ստեղծել է «աննախադեպ մասշտաբի անորոշություն» և ընդգծել, որ Վրաստանի աջակցությունն Ուկրաինայի ինքնիշխանությանն ու տարածքային ամբողջականությանը «բացարձակ ամուր և անսասան է»։

Ինչպես ասել է վարչապետը, չնայած այն հանգամանքին, որ Վրաստանի տարածքի 20%-ն անօրինական կերպով օկուպացված է, «մենք շարունակում ենք առաջ շարժվել»։ Նա ՄԱԿ-ի ամբիոնից նաև դիմել է օկուպացված տարածքների բնակիչներին.

«Ես կցանկանայի օգտվել այս հնարավորությունից և դիմել մեր ժողովրդին, որը գտնվում է օկուպացիոն գծից այն կողմ՝ Աբխազիայում և Ցխինվալիի շրջաններում։ Մեր բոլոր քայլերն ուղղված են մեր ժողովրդին օգնելուն, և մի օր մենք մեր երեխաների հետ միասին կարող ենք ապրել երջանիկ, միասնական և զարգացած Վրաստանում։ Օկուպացիոն գծի այս կողմում մենք ձեզ միշտ գրկաբաց կընդունենք։ Մենք պետք է վերականգնենք մեր երկրի բոլոր ավերված կամուրջները»,- ասել է Կոբախիձեն։

Խոսելով Ուկրաինայում ընթացող պատերազմի, ինչպես նաև Աբխազիայի և Ցխինվալիի տարածաշրջանի մասին՝ վարչապետը երբեք չի հիշատակել Ռուսաստանը։ ՄԱԿ-ի «Ապագայի գագաթնաժողովում» և Անվտանգության խորհրդի նիստում ելույթների ժամանակ նույնպես նա խուսափել է Ռուսաստանի մասին հիշատակելուց։