Մակրոնը խոսել է Ուկրաինայում մասնակի հրադադարի մեկամսյա ծրագրի մասին

Մակրոնն ասել է, որ հրադադարը կարող է վերաբերել օդային և ծովային հարվածներին, ինչպես նաև էներգետիկ ենթակառուցվածքների վրա հարձակումներին:

«Հրադադարի դեպքում շատ դժվար կլինի ճշտել, թե արդյոք դա պահպանվում է ճակատում», - ասել է Էմանուել Մակրոնը՝ նշելով, որ ճակատային գծի երկարությունը հավասար է Փարիզի և Բուդապեշտի միջև եղած հեռավորությանը։

Ծրագրի երկրորդ մասը ենթադրում է եվրոպական երկրներից Ուկրաինա խաղաղապահ զորակազմ ուղարկելը, թեև, ինչպես Մակրոնն է ասել, «առաջիկա շաբաթներին ուկրաինական հողում եվրոպական զորքեր չեն լինի»։

«Հարցն այն է, թե ինչպես կօգտագործենք այս ժամանակը, որպեսզի փորձենք հասնել զինադադարի, բանակցություններ, որոնք կտևեն մի քանի շաբաթ, և երբ խաղաղությունը ստորագրվի, տեղակայում կլինի»,- ասել է Ֆրանսիայի նախագահը։

Ուկրաինայի նախագահ Վլադիմիր Զելենսկիին հարցրել են Մակրոնի ծրագրի մասին, ինչին նա ասել է, որ «տեղյակ է ամեն ինչից»։

Ֆրանսիայի նախագահը նաև ասել է, որ իր երկիրը և եվրոպական մյուս երկրները պետք է պաշտպանության վրա ծախսեն իրենց համախառն ներքին արդյունքի 3-3,5%-ը։ Բացի այդ, Մակրոնը կարծում է, որ Եվրահանձնաժողովը պետք է ավելի նորարարական մոտեցում ցուցաբերի պաշտպանական ծախսերի ֆինանսավորման հարցում։

Փետրվարի 28-ին Վաշինգտոնում՝ Սպիտակ տանը, Վլադիմիր Զելենսկիի, ԱՄՆ նախագահ Դոնալդ Թրամփի և փոխնախագահ Ջեյ Դի Վենսի միջև ծագած վեճից հետո, որը հանգեցրեց հանածոների մասին համաձայնագրի ստորագրման չեղարկմանը, մարտի 2-ին Լոնդոնում կայացավ ռուս-ուկրաինական պատերազմին նվիրված գագաթնաժողով։ Դրան մասնակցել են Եվրամիության, Թուրքիայի, Կանադայի առաջնորդները, ինչպես նաև Ուկրաինայի նախագահը։

Գագաթնաժողովից հետո Մեծ Բրիտանիայի վարչապետ Քիր Սթարմերը հայտարարել է, որ Մեծ Բրիտանիան, Ֆրանսիան և Ուկրաինան պայմանավորվել են աշխատել հրադադարի պլանի վրա, որը կներկայացվի ԱՄՆ-ին։

Սթարմերը ուրվագծել է չորս քայլեր, որոնք համաձայնեցվել են գագաթնաժողովում Ուկրաինայի համար արդար և կայուն խաղաղություն ապահովելու համար.

• Շարունակել ռազմական օգնություն տրամադրել Ուկրաինային այնքան ժամանակ, քանի դեռ պատերազմը շարունակվում է և մեծացնել տնտեսական ճնշումը Ռուսաստանի վրա,
• Ուկրաինան պետք է լինի բանակցությունների սեղանի շուրջ, և ցանկացած խաղաղ համաձայնագիր պետք է ապահովի նրա ինքնիշխանությունն ու անվտանգությունը,
• Խաղաղության համաձայնագրի կնքման դեպքում Մեծ Բրիտանիան և եվրոպական երկրները կշարունակեն ուժեղացնել Ուկրաինայի պաշտպանունակությունը՝ կանխելու Ռուսաստանի ցանկացած ապագա ներխուժումը Ուկրաինա,
• Ուկրաինան պաշտպանելու և երկրում խաղաղություն ապահովելու համար կստեղծվի «Կամավորների կոալիցիա»։

Մեծ Բրիտանիայի վարչապետը խոստացել է, որ Մեծ Բրիտանիան ավելի շատ զենք կտրամադրի Ուկրաինային՝ ասելով, որ 1,6 միլիարդ ֆունտ (2 միլիարդ դոլար) կհատկացնի 5000 հակաօդային պաշտպանության հրթիռներ գնելու համար։