Մենք տեսնում ենք Վրաստանի՝ եվրոպական կուրսից շեղվելու փորձեր. Բերբոք

«Եվրամիությունը հստակ նպատակ է Վրաստանի ժողովրդի համար։ Վերջին շաբաթներին նրանք Թբիլիսիի փողոցներում ծածանում էին ԵՄ դրոշը՝ բազմակարծության և օրենքի գերակայության պաշտպանության համար ցույցեր անցկացնելով։ Իմ այցով ուզում եմ ցույց տալ, որ Գերմանիան լիովին աջակցում է Վրաստանի եվրոպական հեռանկարին։

Մենք տեսնում ենք երկրի՝ Վրաստանի քաղաքացիների ճնշող մեծամասնության աջակցությունը վայելող եվրոպական կուրսից շեղվելու փորձեր և տեսնում ենք այն ճնշումները, որոնց բախվում է երկիրը ներսից և դրսից։

Ես Թբիլիսիում կառավարության հետ կխոսեմ այն ​​քայլերի մասին, որոնք երկիրը պետք է ձեռնարկի ԵՄ անդամակցության թեկնածուի կարգավիճակ ստանալու համար։ Ժողովրդավարական չափանիշները պաշտպանելուց բացի, խոսքը վերաբերում է լրատվամիջոցների ազատությանը, աշխույժ քաղաքացիական հասարակությանն աջակցելուն և հարգալից հանրային բանավեճին, նույնիսկ այն դեպքում, երբ կարծիքները տարբերվում են:

Մեզ՝ Եվրամիությանը, միավորում են այս արժեքները, և մենք վստահ ենք, որ այստեղ պիտակներ կամ նվաստացումներ չեն կարող լինել»,- ասել է Բերբոքը։

Անալենա Բերբոքի մեկնաբանությունը հրապարակել է Գերմանիայի արտաքին գործերի նախարարությունը։ Գերատեսչության փոխանցմամբ՝ նախարարը կայցելի Հյուսիսային Մակեդոնիա և Վրաստան։ Սկոպյե կատարած այցի ընթացքում ուշադրությունը կկենտրոնանա Եվրամիությանը՝ Հյուսիսային Մակեդոնիայի անդամակցության հետագա քայլերի վրա։ Արտաքին գործերի նախարարությունը գրում է, որ Վրաստանը նույնպես ձգտում է անդամակցել Եվրամիությանը, և Վրաստանի հինգ քաղաքացիներից չորսը դա են ցանկանում։

Անալենա Բերբոքն երկօրյա այցով Վրաստան կժամանի այսօր։ Սա նրա առաջին պաշտոնական այցն է Վրաստան։ Գերմանիայի արտաքին գործերի նախարարության տեղեկատվության համաձայն՝ նախարարը հանդիպումներ կունենա Վրաստանի կառավարության ներկայացուցիչների, նախագահ Սալոմե Զուրաբիշվիլիի և այլոց հետ։