გერმანიის საგარეო საქმეთა მინისტრი ანალენა ბერბოკი აცხადებს, რომ საქართველოს ევროპული კურსიდან გადახვევის მცდელობებს ხედავს და თბილისში ვიზიტით, სურს ნათელი გახადოს, რომ გერმანია სრულად უჭერს მხარს ქვეყნის ევროპულ პერსპექტივას.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
„საქართველოს ხალხისთვის ევროკავშირი მკაფიო მიზანია. ბოლო კვირებში ისინი ევროკავშირის დროშას თბილისის ქუჩებში აფრიალებდნენ, როდესაც პლურალიზმისა და კანონის უზენაესობის დასაცავად დემონსტრაციებს მართავდნენ. ჩემი ვიზიტით მინდა ვაჩვენო, რომ გერმანია სრულად უჭერს მხარს საქართველოს ევროპულ პერსპექტივას.
ჩვენ ვხედავთ ქვეყნის ევროპული კურსიდან, რომელსაც საქართველოს მოქალაქეების აბსოლუტური უმრავლესობა უჭერს მხარს, გადახვევის მცდელობებს და ჩვენ ვხედავთ ზეწოლას, რომელსაც ქვეყანა აწყდება შიგნიდან და გარედან.
თბილისში მთავრობას დაველაპარაკები იმ ნაბიჯების შესახებ, რომელთა გადადგმა ქვეყანას კიდევ მოუწევს ევროკავშირის წევრობის კანდიდატის სტატუსის მისაღებად. დემოკრატიული სტანდარტების დაცვის გარდა, საუბარია მასობრივი ინფორმაციის საშუალებების თავისუფლებაზე, ცოცხალი სამოქალაქო საზოგადოების მხარდაჭერასა და პატივისცემით განწყობილ საჯარო დებატებზე, მაშინაც კი, როდესაც ხანდახან შეხედულებები სხვადასხვაა.
ჩვენ, როგორც ევროკავშირს, ეს ღირებულებები გვაერთიანებს და დარწმუნებული ვართ, რომ აქ არ შეიძლება იყოს იარლიყები ან დამცირება“, - განაცხადა ბერბოკმა.
ანალენა ბერბოკის კომენტარი გერმანიის საგარეო საქმეთა სამინისტრომ გაავრცელა. უწყების ინფორმაციით, მინისტრი ჩრდილოეთ მაკედონიას და საქართველოს ეწვევა. სკოპეში ვიზიტისას ყურადღება გამახვილებული იქნება ჩრდილოეთ მაკედონიის ევროკავშირში გაწევრიანების შემდეგ ნაბიჯებზე. საგარეო საქმეთა სამინისტრო წერს, რომ საქართველოც მიისწრაფვის, შეუერთდეს ევროკავშირს და საქართველოს ხუთიდან ოთხ მოქალაქეს სწორედ ეს სურს.
ანალენა ბერბოკი ორდღიანი ვიზიტით საქართველოს დღეს ეწვევა. ეს მისი პირველი ოფიციალური ვიზიტია საქართველოში. გერმანიის საგარეო საქმეთა სამინისტროს ინფორმაციით, მინისტრი შეხვედრებს გამართავს საქართველოს მთავრობის წარმომადგენლებთან, პრეზიდენტ სალომე ზურაბიშვილთან და სხვებთან.
