«Մեզ ծեծում էին խոսելու համար». Ջափարիձեի և Մոսիաշվիլիի դատավարությունը հետաձգվեց

«Գործընթացը հետաձգվեց, քանի որ մեզ բուժզննում անցկացրին, և որոշվեց, որ մեզ պետք է տեղափոխեն հիվանդանոց հետազոտությունների, քանի որ հնարավոր է գլխուղեղի վնասվածքներ ստացած լինենք»,- ասել է Ջափարիձեն՝ լքելով նիստերի դահլիճը։ «Իրականում այս գործը Մոսիաշվիլիի և իմ ձերբակալության մասին չէ։ Սա մեր առևանգման հարցն է: Մենք եղել ենք հանրահավաքին, ոչ մեկի հանդեպ ոչ բանավոր, ոչ ֆիզիկական բռնություն չենք գործադրել։ Ընդհակառակը՝ այնտեղ հատուկ նշանակության ջոկատի անդամները սկսեցին ծեծել երիտասարդներին, այդ ժամանակ (տեսանյութում երևում է) ես մեջքով կանգնեցի հատուկ ջոկատայիններին՝ երեխաներին ծածկելու համար, և այդ ժամանակ նրանք ինձ հետ քաշեցին։ 5-6 հոգի քաշքշում էին ինձ ու հարվածում։ Դարպասի ներսում (ապրիլի 9-ի փողոցում դարպասը, որտեղից երբեմն դուրս են գալիս) շարունակեցին մեզ ծեծել ձեռքերով, ոտքերով, մահակներով։ Գլխիս վերքերը մահակներից են։

Ներսում շարունակեցի խոսել, ոստիկանների հետ էի խոսում, որից հետո արդեն կանգնած էին ծեծում։ Մեզ ասացին, որ եթե չավարտեմ խոսակցությունը, կշարունակեն, որից հետո դադարեցի խոսել։ Նրանք հատուկ նշանակության ջոկատի ներկայացուցիչներ էին, բոլորը դիմակներով էին, ոչ մեկի դեմքը չգիտեմ, աչքերը հիշում եմ»։

Ներքին գործերի նախարարությունը Զուրաբ Ջափարիձեին և Լևան Մոսիաշվիլիին մեղադրում է ոստիկանության պահանջին չենթարկվելու և մանր խուլիգանության [հայհոյանքների] մեջ։

«Նման բան չի եղել։ Դուք կարող եք տեսնել կադրերը։ Նրանք չեն կարող դա ապացուցել։ Մեզ չեն ձերբակալել, մեզ առևանգել են, ծեծել, հաշվեհարդար են տեսել։ Մոտ մեկ ժամ անցկացրինք այդ բակում, ուղղակի լուռ կանգնած էինք, քանի որ մեզ ծեծում էին խոսելու համար ու սպասում էինք, թե ինչպես են հենց մեր դիմաց ծրագրում Ռուսթավելին մաքրելու օպերացիան։ Երկու գիշեր եղել ենք քննչական մեկուսարանում։

Այն, որ ամեն ինչ ավարտվեց արձանագրության ստորագրմամբ, դեռ չի նշանակում, որ մեզ ձերբակալեցին։ Մեզ առևանգեցին, ծեծեցին, բայց հետո մեզ մեղադրեցին օրենքը խախտելու մեջ»,- ասում է ընդդիմադիր քաղաքական գործիչը։

Դատաքննությունը կվերսկսվի մարտի 10-ին, ժամը 16:00-ին։ Վարչական իրավախախտումների վերաբերյալ օրենսգիրքը նախատեսում է տուգանք՝ 500-ից 3000 լարիի չափով կամ վարչական ազատազրկում՝ մինչև 15 օր ժամկետով, թեթև խուլիգանության և ոստիկանության պահանջներին չենթարկվելու համար։

Մարտի 7-8-ին խորհրդարանի մոտ ընդդեմ «օտարերկրյա գործակալների» մասին ռուսական օրենքի ընդունման հազարավոր բողոքի ակցիաներ են տեղի ունեցել, որոնք ցրվել են ՆԳՆ-ի կողմից հատուկ ջոկատայինների միջոցով։ Կառավարությունը խաղաղ ցուցարարների դեմ զանգվածաբար արցունքաբեր գազ, ջրցան մեքենաներ և այլ միջոցներ է կիրառել։ Հատուկ նշանակության ջոկատի աշխատակիցները ֆիզիկական բռնություն են գործադրել հանրահավաքի մասնակիցների նկատմամբ։ Ներքին գործերի նախարարությունը ձերբակալել է ցույցերի 134 մասնակցի։