Մեզ մտահոգում է այս օրենքի կիրարկումը նրանց նկատմամբ, ովքեր կամավոր չեն գրանցվել. Միլլեր

«Վրաստանի կառավարությունը շարունակում է շարժվել խորը, խորապես անհանգստացնող ուղղությամբ, որը երկիրը հեռացնում է եվրատլանտյան հետագծից, ինչին վրաց ժողովուրդը, ինչպես գիտենք, շատ է ձգտում: Մենք մտահոգված ենք այս օրենսդրության կիրարկումով այն կազմակերպությունների նկատմամբ, որոնք կամավոր չեն գրանցվել, այդ թվում՝ քննադատական ​​քաղաքացիական հասարակության կազմակերպությունները և անկախ լրատվամիջոցները»,- ասել է Միլլերը սեպտեմբերի 3-ի ճեպազրույցում, որտեղ նրան հարցրել են, թե արդյոք ունի օրենքի վերաբերյալ որևէ նորություն, այդ թվում՝ կոնկրետ վրացի պաշտոնյաների համար ԱՄՆ ճանապարհորդության արգելքի մասին։

Մեթյու Միլլերը նշել է, որ ԱՄՆ-ի և Վրաստանի միջև երկկողմ համագործակցության համապարփակ վերանայման շրջանակներում, որը հայտարարել է պետքարտուղար Էնթոնի Բլինքենը, վիզային սահմանափակումներ են մտցվել Վրաստանի տասնյակ քաղաքացիների և նրանց ընտանիքի անդամների, այդ թվում՝ «Վրացական երազանքի» անդամների, խորհրդարանականների, ուժային կառույցների ներկայացուցիչների և առանձին քաղաքացիների նկատմամբ։ Նաև ԱՄՆ-ը դադարեցրել է 95 միլիոն ԱՄՆ դոլարի օգնությունը, որը, ըստ Միլլերի, «ուղղակիորեն օգուտ էր բերում Վրաստանի կառավարությանը»։

«Հարցի երկրորդ մասին պատասխանելու համար՝ այս վերանայումը շարունակվում է։ Չեմ բացառում հետագա գործողություններ»,- ասել է Մեթյու Միլլերը։

Վրաստանի վարչապետ Իրակլի Կոբախիձեն Պետդեպարտամենտի խոսնակի հայտարարությունները կապում է «Գլոբալ պատերազմի կուսակցության» հետ։

«Գլոբալ պատերազմի կուսակցությունը լուրջ ազդեցություն ունի որոշ կառույցների վրա, այդ թվում՝ Ամերիկայի Միացյալ Նահանգներում, ցավոք, այդ թվում՝ Պետդեպարտամենտի, և, հետևաբար, մենք լսում ենք նման հաղորդագրություններ, ինչը շատ ցավալի է։

Մեզ համար ամենակարևորը մեր ազգային շահերի պաշտպանությունն է, և ամենակարևորն այն է, որ երկիրը չհայտնվի նույն իրավիճակում, ինչ մեր բարեկամ երկիրը՝ Ուկրաինան»,- ասել է Կոբախիձեն։

Այսպես կոչված «օտարերկրյա գործակալների» մասին ռուսական օրենքի հիման վրա ստեղծված հատուկ ռեգիստրում եկամուտի 20 տոկոսից ավելին արտերկրից ստացող ոչ կառավարական և լրատվական կազմակերպությունների կամավոր գրանցման ժամկետը լրացել է սեպտեմբերի 2-ին։ Հանրային ռեգիստրի ֆինանսական մոնիտորինգի վարչությունը սեպտեմբերի 3-ից իրավունք ունի ստուգել և տուգանել բոլոր այն կազմակերպություններին, որոնք հրաժարվել են գրանցվելուց։ Արդարադատության նախարարության վերջին տվյալներով՝ 476 կազմակերպություններ կամավոր գրանցվել են որպես «օտարերկրյա ուժի շահեր կրող»։