Մոսկվայի մարզում Superjet 100 ինքնաթիռ է կործանվել, զոհվել է անձնակազմի երեք անդամ

Ռուսական լրատվամիջոցների փոխանցմամբ՝ ինքնաթիռը պատկանել է «Գազպրոմ» պետական ​​կորպորացիային և վերանորոգման աշխատանքներ կատարելուց հետո փորձնական թռիչք էր իրականացնում։ Վթարի ենթարկված Sukhoi Superjet 100 ինքնաթիռը գործարկվել է տասը տարի առաջ՝ 2014 թվականին։

Քննչական կոմիտեն քրեական գործ է հարուցել օդային տրանսպորտի անվտանգության կամ շահագործման կանոնները խախտելու փաստի առթիվ։ Վարկածներից մեկի համաձայն՝ ինքնաթիռի կործանման պատճառը եղել է տեխնիկական անսարքությունը։

Sukhoi Superjet 100-ը ռուսական մարդատար ինքնաթիռ է։ «Ազիմուտ» և Red Wings ավիաընկերությունները հենց այս ինքնաթիռներով են չվերթներ իրականացնում Ռուսաստանի և Վրաստանի միջև։

Ներկայում Red Wing-ի նավատորմում կա 20 Sukhoi SuperJet 100: Ընկերության կայքում հրապարակված տեղեկատվության համաձայն՝ յուրաքանչյուրը համապատասխանում է տեխնիկական պահանջներին և անվտանգության միջազգային չափանիշներին։ «Ազիմուտին» է պատկանում 20 SuperJet 100:

Սա առաջին դեպքը չէ, երբ Sukhoi SuperJet 100 ինքնաթիռը ավիավթարի է ենթարկվում։ 2019 թվականի մայիսին «Աերոֆլոտի» սեփականությունում գտնվող այս ինքնաթիռը Մոսկվայից Մուրմանսկ էր թռչում, երբ թռիչքից կես ժամ անց ստիպված եղավ վերադառնալ Շերեմետևո օդանավակայան։ Վայրէջքի ժամանակ ինքնաթիռում հրդեհ է բռնկվել։ Օդանավի մեջ եղել է 78 մարդ, որից 41-ը մահացել է։