Մոսկվայում պայթեցրել են Ուկրաինայում քիմիական զենք կիրառելու մեջ մեղադրվող գեներալին

Պայթյունը տեղի է ունեցել դեկտեմբերի 17-ին, առավոտյան, Ռյազանի պողոտայում։ Քննչական կոմիտեի տվյալներով՝ «գործարկվել է բնակելի տան մուտքի մոտ կանգնած սկուտերի մեջ տեղադրված պայթուցիկ սարքը»։ Հարուցվել է քրեական գործ ահաբեկչության, սպանության և զենքի ապօրինի շրջանառության հոդվածներով։

54-ամյա Կիրիլովը Ռադիոլոգիական, քիմիական և կենսաբանական պաշտպանության ուժերի ղեկավար է դարձել 2017 թվականի ապրիլին և լայնորեն հայտնի է դարձել Ուկրաինայի դեմ Ռուսաստանի պատերազմի սկսվելուց հետո, երբ նա պարբերաբար հայտնվում էր ճեպազրույցների ժամանակ և առանց ապացույցներ ներկայացնելու պնդում էր, որ Ուկրաինան ներգրավված է քիմիական և կենսաբանական զենքի մշակման մեջ։

2024 թվականի հոկտեմբերին Մեծ Բրիտանիայի կառավարությունը պատժամիջոցներ է սահմանել գեներալ Կիրիլովի նկատմամբ «Ուկրաինայում բարբարոսական քիմիական զենք տեղակայելու համար», ինչը Մոսկվան հերքել է։ Բացի այդ, Բրիտանիայի կառավարությունը գեներալին անվանել է «Կրեմլի ապատեղեկատվության կարևոր խոսափող», որը տարածում էր «ստեր Ռուսաստանի խայտառակ և վտանգավոր պահվածքը քողարկելու համար»։

Պայթյունից մեկ օր առաջ՝ դեկտեմբերի 16-ին, Ուկրաինայի անվտանգության ծառայությունը հեռակա մեղադրանք է ներկայացրել Իգոր Կիրիլովին։ Իրավապահները հայտարարել են, որ նա պատասխանատու է արևելյան և հարավային ճակատներում Ուկրաինայի պաշտպանների դեմ ռուսական զորքերի կողմից քիմիական զենք կիրառելու համար։

Ուկրաինական լրատվամիջոցները՝ Ukrainska Pravda-ն, Kyiv Independent-ը և RBC Ukraine լրատվական գործակալությունը, աղբյուրի հիման վրա հայտնում են, որ գեներալ-լեյտենանտը սպանվել է Ուկրաինայի հատուկ ծառայությունների կողմից։