Նման ամոթալի բան չեմ տեսել, պատրաստվել է ԿԳԲ-ի դարբնոցում․ նախագահը՝ «Երազանքի» պաստառների մասին

«Ես երբեք չեմ տեսել այսքան ամոթալի, մեր մշակույթին, ավանդույթներին, պատմությանն ու հավատքին այդքան վիրավորող բան... Ինչ վիճակում պետք է լինես, ինչ ողորմելի վիճակում, որ քո ժողովրդին լկտի ու անամոթ կերպով ներկայացնես ԿԳԲ-ի դարբնոցում պատրաստված պաստառ: «Արժանապատվորեն» դեպի դժողք»,- գրել է Սալոմե Զուրաբիշվիլին Facebook սոցիալական ցանցում։

Թբիլիսիում հայտնվել են իշխող կուսակցության նոր նախընտրական պաստառները՝ «Ոչ պատերազմին, ընտրիր խաղաղությունը» գրությամբ։ Պաստառների մի կողմում պատկերված է Ուկրաինայում Ռուսաստանի կողմից ռմբակոծված տաճարը, իսկ մյուս կողմում՝ Սամեբան, որը, ըստ «Վրացական երազանքի» անդամների, կառուցել է Բիձինա Իվանիշվիլին։ Մյուս պաստառների վրա պատկերված է ավերված Մարիուպոլի աշտարակը, կողքին՝ Բաթումին, Խարկովի ռմբակոծված սպորտային համալիրը, կողքին՝ Ռուսթավիում նորակառույց նմանատիպ օբյեկտը և այլն։

Պաստառների սև ու սպիտակ կողմում, որտեղ գտնվում են ուկրաինական ավերված քաղաքներն ու շենքերը, խաչ է քաշված ընդդիմադիր քաղաքական կուսակցությունների նախընտրական համարների վրա՝ 4, 5, 9 և 25, իսկ մյուս կողմում՝ «Վրացական երազանքն» է 41 համարով։

«Այո, որ Ռուսաստանի կողմից չռմբակոծվի, երեխաներ չսպանվի, հիվանդանոցներ չռմբակոծվի, եկեղեցիներ չռմբակոծվի ու նման զոհեր չունենանք, սա պետք է հիշեցնենք հասարակությանը։ ...

Հասարակությունը պետք է իմանա տարբերությունը՝ երբ իշխանությունը մեզ նման է վարվում, ինչ ենք ստանում և երբ իշխանությունն իրեն այլ կերպ է պահում, ինչ կարող է լինել»,- այսպես է արձագանքել «Վրացական երազանքի» գործադիր քարտուղար Մամուկա Մդինարաձեն քննադատություններին։

Մդինարաձեն կարծում է, որ սոցցանցում պաստառները բացասական են գնահատում միայն «ազգային շարժման ակտիվիստները»։