Նոր մանրամասներ Թելավիում 26-ամյա կնոջ սպանությունից

Դատավոր Մամուկա Ծիկլաուրին չի մեկնաբանում, թե ինչու է որոշում կայացրել ազատ արձակել ընտանեկան բռնության և սպառնալիքների մեջ մեղադրվողին։ Թելավիի շրջանային դատարանում «Վրաստանի լուրերին» թույլ չտվեցին ծանոթանալ վճռին, որից հետո պարզ կլիներ, թե ինչ հանգամանքների վրա է հիմնվել դատավորն այս որոշումը կայացնելիս։ Դատավորի օգնական Լանա Կվիրկվելիան «Վրաստանի լուրերին» հայտնել է, որ տուժողը դիմել է դատարան և խնդրել մեղադրյալի նկատմամբ կալանք չկիրառել։

«Վրաստանի լուրերի» կողմից ձեռք բերած տեղեկություններով՝ Թոռնիկե Գամխվետելաշվիլիին ոստիկանությունը ձերբակալել է հոկտեմբերի 5-ին՝ անչափահաս երեխաների ներկայությամբ կնոջ նկատմամբ բռնություն գործադրելու մեղադրանքով։ Հարցազրույցի արձանագրության մեջ Մարիամ Գամտկիցուլաշվիլին ասում է, որ ամուսինը վաղ առավոտյան ծեծել է իրեն։ Ոստիկանությունը դեպքի վայր է ժամանել 112-ի ահազանգից հետո։

Թոռնիկե Գամխվետելաշվիլիին մեղադրանք է առաջադրվել քրեական օրենսգրքի 3 հոդվածով՝ 126-րդ հոդվածի առաջին մասով, որը վերաբերում է ընտանիքի մի անդամի կողմից ընտանիքի մյուս անդամի նկատմամբ բռնությանը, համակարգված բռնությանը, շանտաժին կամ նվաստացմանը, որն առաջացրել է ֆիզիկական ցավ կամ տառապանք և որը չի պատճառել առողջական վնաս, 126-րդ պրիմա հոդվածի 2-րդ մասով՝ նույն արարքը, որը կատարվել է անչափահասի ներկայությամբ սեփական ընտանիքի անդամի նկատմամբ, 11-րդ պրիմա 151-րդ հոդվածի 2-րդ մասով՝ ընտանիքի անդամի նկատմամբ սպանության կամ առողջությանը վնաս պատճառելու կամ գույք ոչնչացնելու սպառնալիքներ, երբ սպառնալիքի տակ գտնվող անձը ողջամիտ վախ ունի սպառնալիքն իրականացնելու համար։ Հանցագործությունը պատժվում է մինչև 3 տարի ազատազրկմամբ։

«Պաշտպանական կողմի միջնորդությունն էր, որպեսզի դատավորը մեղադրյալի համար գրավ կիրառի 2000 լարիի չափով։ Դատարանին ներկայացվել է տուժողի նամակը, որտեղ նա հայտնել է իր դիրքորոշումը, որ այս փուլում հաշտվել են և խնդրում է դատարանին չկալանավորել ամուսնուն։ Դատավորը հաշվի առավ մեր խնդրանքը և Թոռնիկե Գամխվեթելաշվիլիին հանդեպ կիրառեց գրավը։ Երբ պրոցեսն ավարտվեց ու գնացինք, կինը դրսում սպասում էր։ Նա ուրախացավ, նույնիսկ շնորհակալություն հայտնեց», - «Վրաստանի լուրերին» ասում է փաստաբան Նազի Սումբաձեն, ով պաշտպանում էր Թոռնիկե Գամխվետելաշվիլիի շահերը՝ նրա նկատմամբ խափանման միջոց կիրառելու հարցը քննարկելիս։

- Տիկին Նազի, դատախազությունը որպես խափանման միջոց ի՞նչ էր պահանջում։

- Ազատազրկում:

- Երբ միջնորդեցիք գրավի կիրառումը, մինչ այդ դատարանը երբ ծանոթացավ տուժող կնոջ դիրքորոշման և պահանջի մասին, դատախազությունը փոխե՞լ է իր միջնորդությունը և համաձայնե՞լ է Ձեզ հետ։

- Ոչ, չեն փոխել, պահանջում էին կալանավորել։

- Դատախազությունը բողոքարկե՞լ է Թոռնիկե Գամխվետելաշվիլիին գրավի դիմաց ազատ արձակման որոշումը։

- Ես տեղեկություն չունեմ։ Մինչ ես լսել եմ սպանության պատմությունը, ոչ Թոռնիկեն, ոչ էլ որևէ մեկը ոչինչ չեն ասել ինձ այդ մասին։ Մեկ ամսվա ընթացքում գրավը պետք է վճարեինք, անշարժ գույքով էր պատրաստվում դա անել։ Նա նույնիսկ գրավը դեռ չի վճարել։

Վրաստանի գլխավոր դատախազության տվյալներով՝ գերատեսչությունը դատավոր Մամուկա Ծիկլաուրիի՝ հոկտեմբերի 6-ին կայացրած որոշումը բողոքարկել է Թբիլիսիի վերաքննիչ դատարանում, սակայն գրավի դիմաց ազատ արձակված անձը սպանել է կնոջը՝ մինչ բողոքի քննությունը։

Հոկտեմբերի 9-ին, ժամը 17:00-ի սահմաններում, երեխայի ներկայությամբ սպանվել է երեք անչափահաս երեխաների մայր Մարիամ Գամտկիցուլաշվիլին։

«6 տարեկան երեխան վազեց մոտս, ասաց շտապիր տատիկ, մորս քարշ տալով զուգարան է տանում ու խեղդում է, դանակը թաքցրել եմ նրանից: Մեկուկես տարեկան երեխան մնացել էր տանը, նրա ներկայությամբ է սպանել:

Նրան մի քանի օր առաջ բռնել էին, ինձ էլ էր հարվածել, բայց հարազատներն այնքան բան արեցին, որ բաց թողեցին»,- պատմում է սպանվածի մայրը՝ Լեյլա Փիրանիշվիլին։

Սպանված կինը երեխաների և ամուսնու հետ ապրում էր ծնողների մոտ՝ վարձակալած բնակարանում։

Ըստ ՆԳՆ-ի՝ հետաքննությամբ պարզվել է, որ ալկոհոլի ազդեցության տակ գտնվող Թոռնիկե Գամխվետելաշվիլին դանակով մահացու վիրավորում է հասցրել Մարիամ Գամտկիցուլաշվիլիի կոկորդին և թաքնվել դեպքի վայրից։

Ոստիկանները որպես ապացույց առգրավել են հանցագործության զենքը, իսկ Թոռնիկե Գամխվետելաշվիլին քիչ անց ձերբակալվել է։ Ընտանիքի անդամի դիտավորությամբ սպանության դեպքի առթիվ հետաքննությունը տարվում է քրեական օրենսգրքի 11-րդ պրիմա 109-րդ հոդվածով։ Հանցագործությունը պատժվում է 16-ից 20 տարի ժամկետով կամ ցմահ ազատազրկմամբ։

2021 թվականի նոյեմբերի 29-ին դատավոր Մամուկա Ծիկլաուրին ազատ արձակեց «Վրացական երազանքի» նախկին պատգամավոր Զուրաբ Զվիադաուրին, որը մեղադրվում էր 27-ամյա Նիկա Կենչոշվիլիի կանխամտածված սպանության մեջ և նրա հետ միասին Ջաբա Ջանգիրաշվիլիին, ով մեղադրվում էր ապօրինի զենք կրելու մեջ։ Երկուսի դեպքում էլ դատավորը կալանքը փոխարինեց գրավով։ Վրաստանի դատախազությունը հատուկ հայտարարությամբ է արձագանքել Մամուկա Ծիկլաուրիի որոշմանը.

«Դատախազության համար պարզ չէ, թե Թելավիի շրջանային դատարանի դատավոր Մամուկա Ծիկլաուրին ինչով է առաջնորդվել և ինչ հանգամանքներով։ Մեղադրող կողմը դատաքննության ընթացքում լիովին հիմնավորված միջնորդեց որպես խափանման միջոց կալանքը թողնել ուժի մեջ և բողոքարկել իրական վտանգները, որոնք ազատության մեջ լինելու դեպքում կապված են մեղադրյալի կողմից կատարված հնարավոր նոր հանցագործությունների և վկաների վրա ազդեցության հետ։ Այդուհանդերձ, վերոնշյալ հանգամանքները դատավորի կողմից հաշվի չեն առնվել, ինչի պատճառով մեղադրյալի խափանման միջոցը փոխարինել է 50 000 լարի, իսկ մյուս մեղադրյալին՝ 5 000 լարի գրավով։ Նշենք, որ մինչդատական ​​նիստում կայացված որոշումը չի բողոքարկվում, ուստի մենք զրկված ենք նշված որոշումը վերադաս ատյանում բողոքարկելու հնարավորությունից։ Մեղադրող կողմը գտնում է, որ դատավորի հիշյալ որոշումն անհիմն է, և նրա կողմից կիրառված խափանման միջոցը չի ծառայում խափանման միջոցի նպատակների իրականացմանը»։

Մամուկա Ծիկլաուրին դատավոր է աշխատում 2007 թվականից։ Եղել է Ռուսթավիի քաղաքային դատարանի դատավոր։ 2007-2009 թվականներին գործուղման հիմքով Մառնեուլիի շրջանային դատարանում կատարել է նախագահի լիազորությունները։ 2009-2017 թվականներին եղել է Թելավիի շրջանային դատարանի նախագահ։ 2017 թվականի մայիսից Թելավիի շրջանային դատարանի դատավոր է։ 2020 թվականի մայիսից նա այդ պաշտոնում նշանակվել է ցմահ՝ մինչև օրենքով սահմանված տարիքի լրանալը։