Ընտրությունները աչքի ընկան լուրջ խախտումներով, սա հետաքննություն է պահանջում. Բորել

Բորելի խոսքով՝ խախտումները շատ են և դրանցից մի քանիսը ցավալի են։

«Կարևոր է նշել, որ անկախ դիտորդները ընտրությունները չեն հայտարարել ազատ և արդար, ոչ էլ՝ հակառակը։ Այնպես որ, մենք գտնվում ենք այնպիսի իրավիճակում, որը պահանջում է հետաքննություն՝ պարզելու, թե ինչ է տեղի ունեցել, ինչպիսին է խախտումների շրջանակը և ինչպես է դա ազդել արդյունքի վրա»,- ասել է Ժոզեֆ Բորելը։

Նրա խոսքով, դա ամրապնդում է այն միտումը, որը նկատվում է Վրաստանի իշխանությունների կողմից վերջին ամիսներին, և որը հեռացնում է երկիրը Եվրամիությունից, նրա արժեքներից և սկզբունքներից։

«Եթե Վրաստանի ղեկավարության կողմից կա քաղաքական կամք, մենք առաջարկում ենք Եվրամիություն տանող ճանապարհին կրկին ներգրավվելու հստակ ուղի` չեղյալ համարել արտաքին ազդեցության մասին օրենքը, որը վնասակար ազդեցություն է թողնում քաղաքացիական հասարակության և լրատվական կազմակերպությունների վրա և այսպես կոչված ընտանեկան արժեքների մասին օրենքը, քանի որ ԵՄ ընտանիքում խտրականությունը արժեք չէ»,- ասել է Բորելը` նշելով, որ սա կլինի Վրաստանի կառավարության կողմից եվրոպական արժեքներին նվիրվածության առաջին նշանը։

«Շատ կարևոր է ուշադրությամբ հետևել առաջիկա օրերին դիտորդների կողմից արձանագրված խախտումների հետաքննության և պարզաբանման հետ կապված զարգացումներին»,- ասել է Բորելը։