Ուկրաինան արագացված կարգով անդամակցության դիմում է ներկայացրել ՆԱՏՕ-ին

Զելենսկու խոսքով՝ Ուկրաինան արդեն ապացուցել է իր համատեղելիությունը դաշինքի չափանիշներին ինչպես մարտի դաշտում, այնպես էլ փոխադարձ համագործակցության բոլոր ասպեկտներում։

«Մենք դե ֆակտո դաշնակիցներ ենք։ Այսօր Ուկրաինան դե յուրե, արագացված կարգով հայտ կներկայացնի։ Մենք գիտենք, որ դա հնարավոր է: Մենք տեսանք, թե ինչպես Ֆինլանդիան և Շվեդիան սկսեցին միանալ դաշինքին՝ առանց անդամակցության գործողությունների ծրագրի։ Դա արդարացի է: Դա արդարացի է նաև Ուկրաինայի համար»,- ասել է Զելենսկին։

Ուկրաինայի նախագահը դիմումը ստորագրել է վարչապետ Դենիս Շմիգալի և Գերագույն Ռադայի նախագահ Ռուսլան Ստեֆանչուկի հետ։

ՆԱՏՕ-ին անդամակցելու համար անհրաժեշտ է դաշինքի բոլոր անդամների՝ բոլոր երեսուն պետությունների կոնսենսուսը։ Վլադիմիր Զելենսկու խոսքով՝ Ուկրաինան հասկանում է, որ նման կոնսենսուսի հասնելն անհրաժեշտ է, և այն ձեռք կբերվի։ Ուկրաինայի առաջարկն է՝ կյանքի կոչել անվտանգության երաշխիքների վերաբերյալ նախաձեռնությունը, որը մշակել է արևմտյան գործընկերների հետ։

«Միայն մեր տարածքից օկուպանտների վտարումը կվերականգնի խաղաղությունը։ Մենք կգնանք այս ճանապարհով», - ասել է Զելենսկին՝ հավելելով, որ Ուկրաինան պատրաստ է բանակցությունների, բայց «արդեն Ռուսաստանի մեկ այլ նախագահի հետ, պարզ է, որ այդ [բանակցությունը] անհնար է Ռուսաստանի այս նախագահի հետ։ Նա չգիտի, թե ինչ է պատիվն ու ազնվությունը»։

2008 թվականին ՆԱՏՕ-ի Բուխարեստի գագաթնաժողովում որոշվեց, որ Ուկրաինան և Վրաստանը կդառնան ՆԱՏՕ-ի անդամ, սակայն երկրները չստացան անդամակցության գործողությունների ծրագիրը։

2010 թվականի նախագահական ընտրություններից հետո, երբ նախագահ ընտրվեց Վիկտոր Յանուկովիչը, Ուկրաինան այլևս չխնդրեց անդամակցել ՆԱՏՕ-ին։

2014 թվականին, երբ Յանուկովիչը փախավ Ուկրաինայից, Ռուսաստանը ներխուժեց Ուկրաինա և գրավեց Ղրիմի թերակղզին և Սևաստոպոլ քաղաքը, իսկ Դոնեցկի և Լուգանսկի շրջաններն անջատվեցին Ուկրաինայից և հայտարարեցին այսպես կոչված ժողովրդական հանրապետությունների ստեղծման մասին: Ուկրաինայի նոր կառավարությունը առաջնահերթություն դարձրեց ՆԱՏՕ-ին անդամակցությունը։

2019 թվականի փետրվարի 21-ին Ուկրաինայի Սահմանադրությունը փոփոխության ենթարկվեց՝ Եվրամիությանն ու ՆԱՏՕ-ին անդամակցելը սահմանվեց որպես Ուկրաինայի ռազմավարական ուղղություն։

2022 թվականի փետրվարի 24-ին Ռուսաստանը կրկին ներխուժեց Ուկրաինա և գրավեց Խերսոնի և մասամբ Զապորոժիեի շրջանները։ Վլադիմիր Պուտինն Ուկրաինայի դեմ այսպես կոչված հատուկ ռազմական գործողության մեկնարկի պատճառներից մեկը նշեց ՆԱՏՕ-ին անդամակցելու վերջինիս ցանկությունը։ Օգոստոսի վերջին Ռուսաստանի Դաշնության Անվտանգության խորհրդի փոխնախագահ Դմիտրի Մեդվեդևը հայտարարել էր, որ ՆԱՏՕ-ին անդամակցելուց հրաժարվելն այլևս բավարար պայման չէ Ուկրաինայում պատերազմը դադարեցնելու համար։