Պուտինը շնորհավորել է Թրամփին նախագահական ընտրություններում տարած հաղթանակի կապակցությամբ

«Սկզբում բոլորն ասում էին, որ նա բիզնեսմեն է ու քաղաքականությունից քիչ բան կհասկանա, կարող է սխալվել։ Բայց նախ կարող եմ ասել, որ նրա պահվածքը, երբ նրան սպանելու փորձ արեցին, ինձ տպավորեց։ Պարզվեց, որ նա համարձակ մարդ է։ Մարդն իրեն դրսևորում է արտասովոր պայմաններում, և իրեն դրսևորել է, իմ կարծիքով, շատ ճիշտ՝ համարձակ, որպես տղամարդ։

Չգիտեմ՝ հիմա ինչ կլինի, գաղափար չունեմ։ Նրա համար սա վերջին ժամկետն է, թե ինչ կանի, իր գործն է։ ...Այն, ինչ ասվեց Ռուսաստանի հետ հարաբերությունները վերականգնելու, Ուկրաինայի ճգնաժամին վերջ դնելու ցանկության մասին, իմ կարծիքով, այն առնվազն ուշադրության է արժանի։

Օգտվելով առիթից՝ ցանկանում եմ շնորհավորել նրան Ամերիկայի Միացյալ Նահանգների նախագահի պաշտոնում ընտրվելու կապակցությամբ։ Ես արդեն ասել եմ, որ մենք աշխատելու ենք ցանկացած պետության ղեկավարի հետ, որին վստահում է ամերիկյան ժողովուրդը։ Դա միանշանակ կլինի գործնականում»,- ասել է Պուտինը։

Հարցին, թե ինչ կանի, եթե Թրամփը երդմնակալությունից առաջ զանգի իրեն և հանդիպում խնդրի, ՌԴ նախագահը պատասխանել է.

«Գիտեք, ամոթ չեմ համարում իմ կողմից զանգելը։ Ես դա չեմ անում, քանի որ արևմտյան երկրների ղեկավարները գրեթե ամեն շաբաթ ինչ-որ պահի զանգում էին ինձ, հետո հանկարծակի դադարեցին։ Եթե ​​չեն ուզում, թող չուզեն։ Ինչպես տեսնում եք, մենք ողջ ու առողջ ենք, զարգանում ենք, առաջ ենք գնում։ Եթե ​​նրանցից որևէ մեկը ցանկանում է վերականգնել շփումները, ես միշտ ասել եմ, նորից եմ ուզում ասել՝ մենք դրա դեմ ոչինչ չունենք։ Մենք կապերը կվերականգնենք, քննարկումներ կանենք»։

ԱՄՆ նախագահական ընտրություններում հաղթել է Հանրապետական ​​կուսակցության թեկնածու Դոնալդ Թրամփը։ Նա ստացել է ընտրական կոլեգիայի 295 ձայն, իսկ Դեմոկրատական ​​կուսակցությունից նրա մրցակիցը՝ գործող փոխնախագահ Կամալա Հարիսը, կարողացել է հավաքել 226 ձայն։ Հաղթանակի համար անհրաժեշտ էր 270 ձայն։

Իր հաղթանակից հետո Թրամփն ասել է, որ խոսել է համաշխարհային «հավանաբար» 70 առաջնորդների, այդ թվում՝ Ուկրաինայի նախագահ Վլադիմիր Զելենսկիի հետ, բայց դեռևս չի խոսել Վլադիմիր Պուտինի հետ։ «Կարծում եմ՝ մենք կխոսենք»,- հավելել է Թրամփը։

Նախընտրական քարոզարշավի ժամանակ Դոնալդ Թրամփը կրկնել է, որ 24 ժամվա ընթացքում կավարտի Ուկրաինայում ընթացող պատերազմը։

Ամերիկայի 47-րդ նախագահի երդմնակալության արարողությունը տեղի կունենա հունվարի 20-ին։