Պուտինը Վրաստանի քաղաքացիների համար չեղարկել է վիզային ռեժիմը և վերականգնել ուղիղ չվերթները

Վրաստանի քաղաքացիները Ռուսաստանի տարածք կկարողանան մուտք գործել անձը հաստատող փաստաթղթով (Վրաստանի քաղաքացու անձնագիր, դիվանագիտական ​​անձնագիր, ծառայողական անձնագիր, նավաստիի գրքույկ, Վրաստան վերադառնալու ճամփորդական փաստաթուղթ): Բացառություն են կազմում նրանք, ովքեր Ռուսաստան մուտք կգործեն աշխատելու նպատակով կամ 90 օրից ավելի ժամկետով, այդ թվում՝ կրթության նպատակով։

«Մայիսի 15-ից Վրաստանի քաղաքացիները կկարողանան Ռուսաստանի Դաշնության տարածք սահմանային անցակետերով մուտք գործել առանց վիզայի, յուրաքանչյուր 180 օրից 90 օրվա ընթացքում՝ դիվանագիտական, ծառայողական, մասնավոր, գործնական, զբոսաշրջային, հումանիտար նպատակներով, ինչպես նաև կարճաժամկետ ուսումնական նպատակներով: Միևնույն ժամանակ, Վրաստանի այն քաղաքացիները, որոնք մտադիր են ավելի քան 90 օր սովորել ռուսական ուսումնական հաստատություններում, աշխատել, ժամանակավոր կամ մշտապես բնակվել Ռուսաստանի Դաշնությունում, պարտավոր են վիզաներով մուտք գործել և դուրս գալ Ռուսաստանի Դաշնությունից»,- պարզաբանել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան:

Հատկանշական է, որ այսօրվանից Ռուսաստանի արտաքին գործերի նախարարությունը չեղարկում է 2019 թվականի հունիսի 21-ից սեփական քաղաքացիներին Վրաստան մեկնելուց զերծ մնալու հանձնարարականը։

«Սակայն այս երկիր այցելելիս մենք պետք է հաշվի առնենք անվտանգության ասպեկտները, զգույշ լինենք։

Ռուսաստանի Դաշնության նախագահի որոշումները՝ չվերթների վերսկսման և առանց վիզային ռեժիմի ներդրման վերաբերյալ համահունչ են մեր սկզբունքային մոտեցմանը` հետևողականորեն պարզեցնելու Ռուսաստանի և Վրաստանի քաղաքացիների միջև հաղորդակցությունն ու շփումները, չնայած դիվանագիտական ​​հարաբերությունների բացակայությանը», - նշել է Զախարովան:

Ռուսաստանի Դաշնությունը Վրաստանի հետ միակողմանի վիզային ռեժիմ է սահմանել 2000 թվականին։ 2008 թվականի օգոստոսյան պատերազմից և Ռուսաստանի կողմից Վրաստանի օկուպացված տարածքների այսպես կոչված անկախության ճանաչումից հետո Վրաստանը խզեց դիվանագիտական ​​հարաբերությունները Ռուսաստանի հետ, դադարեցվեց նաև Ռուսաստանի քաղաքացիների առանց վիզայի մուտքը երկիր։ 2010 թվականի հոկտեմբերից Վրաստանի կառավարությունը Հյուսիսային Կովկասի հանրապետությունների բնակիչների համար սահմանեց առանց վիզային ռեժիմ, իսկ 2012 թվականի մարտից այդ ռեժիմը տարածվեց Ռուսաստանի բոլոր քաղաքացիների վրա։

2019 թվականի հուլիսից դադարեցին Վրաստանի և Ռուսաստանի միջև ուղիղ օդային հաղորդակցությունները։ Ուղիղ չվերթները դադարեցվել են Պուտինի որոշմամբ, որին նախորդել են Թբիլիսիում բողոքի ցույցերը՝ կապված ՌԴ Դումայի պատգամավոր Սերգեյ Գավրիլովի այցի հետ։