Ռուս զինվորը կրակոցներով հետապնդում էր մեզ. Դոթիաշվիլին՝ Թամազ Գինտուրիի սպանության մասին

«Գերեզմանատանը խմում էինք 6 հոգի՝ ես, Վալիկո Դոթիաշվիլին, Թամազ Գինտուրին, Վասիկո Ծիոտաշվիլին, Պապիտաշվիլին և Մերաբ Դաթիաշվիլին։ Դրանից հետո բաժանվեցինք, երկու մեքենայով գնացինք։ Երեքը մեքենայով գնացին գյուղ, մենք՝ երեքով գնացինք Լոմիսա՝ մոմ վառելու։

Երբ գնացինք եկեղեցու բակ, կադրերը տեսել եք, դուռը բացեցինք։ Երբ մենք գնում էինք, միայն մի ռուս զինվոր եկավ և նախազգուշական կրակոց արձակեց։ Ասացի պետք չէ կրակել, արի հասկանանք իրար։ Այս ռուս զինվորը հանգստացավ, խոսեցինք, ասած տեսախցիկ ունեմ միացրած, հանեց ու այդ ժամանակ Թամազն էլ սկսեց խոսել։ Սովորական, ոչ մի հուզմունք, ոչ մի կոնֆլիկտ, ոչ մի բան, հանգիստ զրուցում էինք։

Դրանից հետո Թամազն ինձ ասաց, որ նստեմ մեքենան, ես նստեցի մեքենան, Թամազն ու սահմանապահը զրուցում էին։ Թամազը սովորականի պես եկավ մեքենայի մոտ, նստեց, հենց մեքենան առաջ քշեց, 3 մետր գնացինք ու անմիջապես կրակեց անվադողերին։ Մենք չէինք սպասում, որ կկրակեն։

Հենց շարժվեցինք, ռուս զինվորը կրակոցներով հետապնդում էր մեզ։ Մի 15-20 մետր գնացինք ու Թամազն ասաց, որ գնդակը դիպել է իրեն։

Դուրս թռա, Թամազին հանեցի մեքենայից։ Ուշաթափվել էր։ Ռուս զինվորին ասացի, որ շտապօգնություն կկանչեմ։ Զանգեցի շտապօգնություն, հետո ոստիկանությունը զանգեց, ասացի, թե որտեղ եմ, ինչպես եմ։ Ես տեսել եմ կրակողին, բայց չեմ կարող ճանաչել։ Ես տեսա այդ լուսանկարները, բայց չկարողացա ճանաչել։

Դրանից հետո 5-6 րոպե անց մնացած ռուս զինվորները դուրս եկան։ Նրանցից մեկն անխնա հարվածեց ինձ։ Նա ինձ պառկեցրեց գետնին։ Այս ընթացքում ինձ արդեն ձեռնաշղթաներ հագցրին, տարան անտառի ուղղությամբ, ու ես այլևս չտեսա Թամազին։ Ճանապարհին վիրավորանքներ ու հարվածներ են եղել։ Նրանք բոլորն ինձ հարվածում էին զենքով, ոմանք՝ կոթով, ոմանք՝ ձեռքով, ես այլևս չէի հասկանում»,- լրագրողներին ասել է Դոթիաշվիլին։

Նոյեմբերի 6-ին ռուս զինվորների կողմից սպանվել է 58-ամյա Թամազ Գինտուրին։ Նրա մեջքին երկու փամփուշտ է հայտնաբերվել։ Նրա հետ գտնվող նույն գյուղի բնակիչ, 33-ամյա Լևան Դոթիաշվիլին չորս օր շարունակ առևանգված էր համարվում։ Նոյեմբերի 7-ին Ցխինվալիի հեռուստատեսությունը տեսանյութ է տարածել, որտեղ երևում է, թե ինչպես են Թամազ Գինտուրին և Լևան Դոթիաշվիլին բացում եկեղեցու փակված դուռը։ Կիրբալիի Լումիսի եկեղեցին գտնվում է օկուպացիոն գծից այն կողմ։ Օգոստոսին օկուպանտները թիթեղով փակել էին եկեղեցու դուռը, որպեսզի ուխտավորները չկարողանան ներս մտնել։ Սպանված Թամազ Գինտուրին 2008 թվականի ռուս-վրացական պատերազմի մասնակից էր, մայոր էր։ Տեղացիները կարծում են, որ հենց դրա համար է նա սպանվել։ Կիրբալիից առևանգված Լևան Դոթիաշվիլին նոյեմբերի 9-ին ազատ է արձակվել Ցխինվալիի շրջանի դե ֆակտո իշխանությունների կողմից։