Ավելի քան 400 մարդ է ձերբակալվել Ռուսաստանի 36 քաղաքներում ռուս ընդդիմադիր քաղաքական գործիչ Ալեքսեյ Նավալնիի հիշատակին նվիրված ակցիաների ժամանակ։ Ըստ OVD info-ի՝ ամենաշատ ձերբակալությունները Սանկտ Պետերբուրգում են, որտեղ փետրվարի 16-18-ը քաղաքացիները ծաղիկներ են դրել քաղաքական բռնաճնշումների զոհերի հուշարձանին։ Ձերբակալվածների թվով երկրորդ տեղում է Մոսկվան, իսկ երրորդում՝ Ստավրոպոլը։
Լրահոս
Ընթերցողի ընտրանի
- 1 Ես կտրականապես դեմ էի առանց վիզայի ռեժիմի կասեցմանը, բայց փոխեցի իմ դիրքորոշումը․ Ռոթ
- 2 Նախագահը չի ճանաչում ընտրությունների արդյունքները. հոկտեմբերի 28-ին Ռուսթավելիում հավաք է նախատեսվում
- 3 Գախարիայի կուսակցությունից հայտնել են, որ ԿԸՀ-ում առկա ընտրակեղծիքների ապացույցները վտանգի տակ են
- 4 Եվրահանձնաժողովի գնահատմամբ՝ Վրաստանը չի կատարել անցյալ տարվա հանձնարարականները
- 5 Բայդենի հայտարարությունից պարզ է դառնում, որ այս ընտրությունները չեն կարող լեգիտիմ ճանաչվել․ «Ուժեղ Վրաստան»
- 6 Եվրահանձնաժողովը խորհուրդ չի տալիս սկսել Վրաստանի անդամակցության շուրջ բանակցությունները
Սանկտ Պետերբուրգում ձերբակալվել է ուղղափառ եկեղեցու քահանա, որը պատրաստվել է Նավալնիի հիշատակին հոգեհանգստի կարգ մատուցել։ Հոգևորականը ոստիկանական բաժանմունքում կաթված է ստացել և տեղափոխվել հիվանդանոց։
Որոշ վայրերում ձերբակալվել են նաև մեկ հոգանոց ակցիայի մասնակիցներ։ «Ալեքսեյ Նավալնին սպանված է։ Նրա արյունը քո ձեռքերին է, Վովա» մակագրությամբ թուղթը բռնած կնոջը տարել են Մուրմանսկ քաղաքի միլիցիայի բաժին։ Նովոսիբիրսկում ևս մի կին է ակցիա կազմակերպել։ Նրան նույնպես ձերբակալել են իրավապահները։
Բացի խաղաղ ցույցերի մասնակիցներին ձերբակալելուց, ոստիկանները հեռացրել են նաև բռնաճնշումների զոհերի հուշահամալիր բերված ծաղիկները։
Փետրվարի 16-ին Յամալ-Նենտա ինքնավար շրջանի դաշնային քրեակատարողական ծառայությունը հայտնել է, որ N3 ուղղիչ գաղութում զբոսնելուց հետո Ալեքսեյ Նավալնին իրեն վատ է զգացել և գրեթե անմիջապես կորցրել է գիտակցությունը։ «Կատարվել են բոլոր անհրաժեշտ վերակենդանացման միջոցառումները, սակայն դա դրական արդյունքի չի բերել։ Շտապօգնության բժիշկները հաստատել են դատապարտյալի մահը։ Մահվան պատճառները պարզվում են»,- հայտարարել է գերատեսչությունը։ Russia Today քարոզչական ալիքի աղբյուրը որպես մահվան պատճառ նշել է թրոմբը։
Ավելի ուշ Նավալնիի մահը հաստատել են նրա կողմնակիցները։ «Ալեքսեյ Նավալնին սպանվել է։ Նա մահացել է փետրվարի 16-ին տեղական ժամանակով ժամը 14:17-ին, ինչպես նշված է Ալեքսեյի մորն ուղարկված պաշտոնական հաղորդագրության մեջ»,- գրել է քաղաքական գործչի մամուլի քարտուղար Կիրա Յարմիշը։
Նավալնիի մարմինը, որը ենթադրաբար գտնվում է Սալեխարդ քաղաքի դիահերձարանում, մինչ այժմ նրա մայրը չի տեսել։ Քննչական կոմիտեից հայտնում են, որ մահվան հանգամանքների քննությունը շարունակվում է։
