Սագարեջոյում հարձակվել են «Ազգային շարժման» անդամների ու լրագրողների վրա

Հարձակվողների թվում են եղել՝ Սագարեջոյի քաղաքապետարանի տնտեսական զարգացման և գույքի կառավարման ծառայության ղեկավար Գիորգի Քուրդովանիձեն, սակրեբուլոյի «Վրացական երազանք-Ժողովրդավարական Վրաստան» խմբակցության նախագահ Իվանե Բեժիաշվիլին և իշխող կուսակցությունից սակրեբուլոյի անդամներ Գիորգի Մամիսաշվիլին և Վեփխիա Ուստիաշվիլին:

«Այսօր Սագարեջոյում մոբիլիզացվել են Սագարեջոյի սակրեբուլոյի, Կախեթիի բոլոր սակրեբուլոների աշխատակիցները և հանրային ծառայողները, որոնք ուղղակիորեն բռնություն են սկսել։ Քարեր են նետել, հայհոյանքներ են հնչեցրել և ֆիզիկական բախում են հրահրել։ Պատասխան են ստացել, բայց սա լուծում չէ, սա նորմալ իրավիճակ չէ, և դրա պատասխանատուն իշխանությունն է»,- ասել է «Միացյալ ազգային շարժում» խմբակցության պատգամավոր Լևան Բեժաշվիլին։

Դեպքի վայր է ժամանել Կախեթիի ոստիկանական բաժանմունքի տնօրեն Թեյմուրազ Կալանդաձեն։ Նրան ուղեկցել են ՆԳՆ մյուս տարածքային ստորաբաժանումների պետերը, ինչը վկայում է այն մասին, որ ոստիկանությունը նախնական տեղեկություն է ունեցել սպասվող բռնության մասին, թեև չի կանխել։ Կալանդաձեի խոսքով՝ «հետաքննությունն ամեն ինչ կանի» մեղավորներին պատժելու համար։

Օրեր առաջ Կասպիում նույնպես հարձակվել են «Ազգային շարժման» ներկայացուցիչների վրա և փորձել խափանել նրանց համախոհների հետ հանդիպումը։ «Վրացական երազանքի» նախագահ Իրակլի Կոբախիձեն տեղի ունեցածն անվանել է «քաղաքացիական ակտիվիզմ» և ասել, որ իշխող կուսակցությունը որևէ կապ չունի միջադեպի հետ։ Կասպիում տեղի ունեցած միջադեպի առնչությամբ ձերբակալվածներ չկան։