Լրահոս

Նախարարության տվյալներով՝ Սամուխիի հովտում չվող թռչունների որսը լրջորեն սպառնում է այծյամների վերականգնման ծրագրին։ Կրակոցների ձայնը վախեցնում է այծյամներին և բաց տարածքներից նրանք ապաստան փնտրելու և թաքնվելու համար տեղափոխվում են անտառային թփուտային շրջաններ, որտեղ դառնում են գայլերի զոհը։

Հաշվի առնելով դա՝ մինչև 2023 թվականի մարտի 1-ը արգելվել է չվող թռչունների որսը Վաշլովանիի պահպանվող տարածքների սահմանագծի և Վրաստան-Ադրբեջան պետական ​​սահմանի միջև ընկած Սամուխիի դաշտում։

Գերմանիայի և Ադրբեջանի կառավարությունների, Բնության համաշխարհային հիմնադրամի (WWF) օգնությամբ 2013 թվականից Սամուխիի դաշտում իրականացվում է այծյամների վերականգնման ծրագիրը։ Վրաստանում այծյամները ամբողջովին վերացել է 1990-ականներին։ Սամուխիի դաշտում և շրջակայքում ներկայումս բնակվում է մոտ 200 այծյամ։ Ադրբեջանից այծյամների ռեինտրոդուկցիան (տեսակի կրկին վերադարձն ու վերականգնումը) համարվում է Վրաստանում ամենահաջողված կոնսերվացիոն և վերականգնման նախագիծը։

Սամուխի դաշտում, Վրաստանի ծայր հարավ-արևելյան հատվածում, Վաշլովանիի պահպանվող տարածքների և ադրբեջանա-վրացական պետական ​​սահմանի միջև, կառավարությունը նախատեսում է ստեղծել «Նուգզար Զազանաշվիլի անվան Սամուխի բազմաֆունկցիոնալ տարածք»: Սա կլինի Վրաստանում առաջին պահպանվող տարածքը, որը կոչվելու է վրացի գիտնական, հայտնի բնապահպան և բանաստեղծ Նուգզար Զազանաշվիլիի անունով։ Նուգզար Զազանաշվիլին այս կազմակերպության հետ համագործակցում է 90-ականների սկզբից, երբ հիմնադրվեց Վայրի բնության համաշխարհային հիմնադրամի (WWF) կովկասյան ծրագիրը։ Նա այս ծրագրի ղեկավարներից էր։ Նրա անմիջական մասնակցությամբ երկրում ստեղծվել են բազմաթիվ պահպանվող տարածքներ։ Նրա ղեկավարությամբ սկսվել է Սամուխիի դաշտի այծյամների վերականգնման ծրագիրը։ Նուգզար Զազանաշվիլին մահացել է անցյալ տարի, 64 տարեկան հասակում։